Элдор Шомуродов коронавирус юқтириб олди

Римнинг «Рома» клуби жамоада коронавирус билан боғлиқ вазият авж олганини расман эълон қилди.

Фото: Getty Images

Клуб расмий сайти хабарига кўра, 4 нафар асосий таркиб футболчиларининг коронавирусга топширган тести мусбат натижа берган. Клуб ушбу ўйинчиларни номма-ном санамасликка қарор қилди. Қайд этилишича, футболчиларда касалликнинг енгил аломатлари сезилган. Улар ўзини яккалаш тартибига ўтказилди.

Аввалроқ, Италия нашрлари римликлар сафидаги Элдор Шомуродов ва Генрих Мхитарян COVID-19 инфекция юқтиргани ҳақида хабар берганди. Яна икки футболчидан бири испаниялик Карлес Перес экани айтилмоқда. Жамоа бош мураббийи Жозе Моуриньо таркибда йўқотишлар юзага келгани, 9 нафар футболчи турли сабаблар билан шанба кунги «Верона»га қарши ўйинни ўтказиб юборишини билдирди.

Маълумот учун, «Рома» - «Верона» учрашуви эртага, 19 февраль шанба куни соат 22:00да бошланади. Римликлар турнир жадвалида 40 очко билан 7-ўринни эгаллаб турибди. Элдор Шомуродов А Серия жорий мавсумида 19 ўйинда 2та голга муаллифлик қилган.

#Рома #Элдор Шомуродов #коронавирус