Хитойда пандемия бошланганидан бери COVID-19 билан касалланганлар сони рекорд даражага етди

Хитой қарийб уч йил олдин бошланган пандемия даврида COVID-19 билан касалланганларнинг кунлик сони рекорд даражага етганини маълум қилди.

Фото: Reuters

23 ноябр куни коронавирус аниқланган беморларнинг сони 31 444 нафарни ташкил қилган. Улардан 3 927 нафарида касаллик белгилари намоён бўлган, 27 517 нафарида кузатилмаган.

Шунингдек, бир ўлим қайд этилган. Пандемия бошланганидан бери уларнинг сони 5232 тага етган.

Пойтахт Пекинда чоршанба куни 509 та янги COVID-19 ҳолати аниқланган.

Мутахассисларнинг фикрига кўра, Хитойнинг мунтазам карантиндан чиқа олмаётгани сабабларидан бири бу Хитой вакциналари самарадорлигининг пастлиги бўлиши мумкин.

Хитой Коммунистик партиясининг Сиёсий бюроси коронавирус тарқалишига қарши 20 та чора-тадбирлар дастурини қабул қилишига қарамай, касалликни жиловлаб бўлмаяпти. Хитой коронавирусга қарши жиддий кураш доирасида шаҳар ва қишлоқлар, йирик саноат ҳудудлари, завод ва фабрикалар, супермаркет ва паркларни карантинга ёпиш амалиётидан фойдаланмоқда. Бу эса ижтимоий тажангликни кучайтириб, мамлакат иқтисодиётига зарба бермоқда.

#Хитой #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.