Самарқандда МЧЖ раҳбари ижарага олган биносини бузиб сотиб юборди

Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.

Фото: Бош прокуратура ҳузуридаги департамент

Бош прокуратура ҳузуридаги департаментнинг хабар беришича, департаментнинг Қўшработ туман бўлими томонидан ўтказилган терговга қадар текширувда МЧЖлардан бирининг раҳбари ўзи ижарага олган бинони бузиб сотиб юборгани аниқланган.

Маълум қилинишича, “Q.G.” МЧЖ раҳбари Д.Б. Қўшработ тумани “Қўралос” қишлоғида жойлашган Самарқанд вилоят “Кичик саноат зоналарини бошқариш бўйича ягона дирекцияси” балансида бўлган бино-иншоотни ижарага олиб, ўзига ишониб топширилган умумий баҳоси 1,3 млрд сўмлик мулкни бузиб, қурилиш материалларини сотиб юборган.

Қайд этилишича, мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

#Самарқанд