Тошкентда қурилиш ташкилоти электр тармоғини узиб юборди

Тошкент шаҳрининг Яккасарой туманида қурилиш ташкилоти электр тармоғига шикаст етказган. Бу ҳақда Энергетика вазирлиги хабар бермоқда.

Маълум қилинишича, бугун, 27 октябр куни соат 10:20 да “M.M.P.”МЧЖга қарашли қурилиш ташкилоти Яккасарой туманидаги ерости газ қувурини электр ва газ таъминоти ташкилотлари ҳамда “Ўзэнергоинспекция” билан келишмасдан кўчириш ишларини олиб бораётган вақтида электр узатиш кабел тармоғига шикаст етказган.

Оқибатда туманнинг Бошлиқ мавзеси ва Бобур маҳалласида 530 та истеъмолчилар электр таъминотидан узилган.

Қайд этилишича, ҳозирги вақтда электр узатиш тармоғида юзага келган носозлик бартараф этилмоқда.