Асирлар, амир ва Арақчи билан. Кремлдаги уч учрашув ҳақида

17 апрел куни АҚШ президенти Трамп Россияда ҳафта охиригача ўт очишни тўхтатиш бўйича қарор қабул қилиш имкони борлигини айтди. Акс ҳолда нима бўлиши ҳақида эса индагани йўқ. Бу вақтда Россия президенти Владимир Путин Кремлда қўли-қўлига тегмай ишлаяпти. Видеода Москвадаги учта кетма-кет ўтказилган учрашувга эътибор берамиз.

ҲАМАС асирлари билан

Демак, 17 апрел кунидаги Путиннинг илк учрашуви ҲАМАС қўлида асирликда бўлган россиялик она-бола Александр ва Елена Труфанова билан бўлди. Учрашувда асирликдан озод қилинган Труфановнинг қаллиғи Сапир Коэн ҳам иштирок этган. Бу қиз ҳам асирликда бўлган, уч асир ҳам Россия томонининг илтимосига кўра ҲАМАС томонидан озодликка чиқарилган.

Учрашувда қатнашган Елена Труфанова Иккинчи жаҳон уруши вақтида унинг ҳарбий врач бўлиб ишлагани бувиси фашистларга асир тушиб, кейин у ердан қочгач, урушни Беларус партизанлари сафида якунлагани, ўғли Александр оиладаги асирга тушган тўртинчи авлод вакили эканини айтди.

Путин асирлар билан учрашувда айтган бир гапи кўпчиликнинг эътиборини тортди. Россия президенти ҲАМАС қўлида 500 кунга яқин асирликда қолган россияликлар билан учрашувда улар озод бўлгани учун ҲАМАС сиёсий қаноти раҳбариятига раҳмат айтиш кераклигини таъкидлади.

Қатар амири билан учрашув

Кўп ўтмай Путин Кремлда Қатар амири Тамим ибн Ҳамад Ол Сонийни қабул қилди. Учрашувда айтарли жиддий ҳужжат имзолангани йўқ. Россия томонидан учрашувда баъзи ҳукумат вакиллари, шунингдек, «Роснефт» раҳбари Игор Сечин, Марказий банк раиси Элвира Набибулина ва Чеченистон раҳбари Рамзан Қодиров қатнашган.

Путин Қатар амири охирги марта 2018 йилда Москвага келганини эслади, жаноб амир ўз навбатида яқинда Россия бош вазири ўринбосари, дўсти Денис Мантуров билан учрашганини айтди, кейин Путинни Қатарга таклиф қилди. Шунингдек, яқинда Сурия президети Аҳмад аш Шаръа билан учрашув вақтида ҳам Сурия – Россия муносабатларини муҳокама қилганини гапириб берди.

Аббос Арақчи билан учрашув

Куннинг учинчи учрашувида Владимир Владимирович Эрон ташқи ишлар вазири Аббос Арақчини қабул қилди. Учрашувда Россия томонидан Путиндан ташқари Сергей Лавров ва Юриш Ушаков, Эрон томондан Арақчидан ташқари фақат Теҳроннинг Россиядаги элчиси Козим Жалолий иштирок этди. Кремл эълон қилган икки энлик хабарда шунчаки учрашув ўтказилгани, унда кимлар бўлгани айтилган холос, қолган тафсилотлар маълум эмас.

Энди бу учрашувлар нимани англатиши ҳақида. Хуллас, Доналд Трамп ва унинг Россия урушни тугатмоқчи эканини айтаётган Стивен Уиткофф каби мулозимлари Путинга босим ўтказиб, уни музокара столига ўтқизаман деб ўйлаётган бир вақтда Россия президенти Кремлда бир кунда учталаб муҳим дипломатик учрашув ўтказмоқда. Яъни Путин жаноблар, менга шарт қўйиб овора бўлманг, сизлар мен ҳақимда интервю бериб юрганда мен ҲАМАС қўлидан озод қилинган асирлар билан учрашув ўтказаётган ва у ердан чиқишимни кимсан Қатар амири кутиб турган бўлади, демоқчи тахминан.

Путиннинг охирги чиқишларига эътибор қаратсангиз, у учун уруш иккинчи планга тушиб қолгани кўринади. У Кремлда космик тадқиқотлар масаласида йиғилиш ўтказяпти, ҳукумат вакиллари билан онлайн учрашувда Владимир областида яшаётган германиялик муҳожир билан немис тилида гаплашмоқда, баъзан эса ёғоч ишлаб чиқариш комплекси очилиш маросимида қатнашиш каби кундалик юмушлар билан машғул бўлмоқда. Бу билан Путин Россия учун уруш аллақачон оддий ҳаёт тарзига айлангани, у ҳеч қандай иқтисодий ёки сиёсий муаммо туғдирмаслиги, Ғарбнинг Россияга босим ўтказиши бефойда эканини кўрсатмоқчи бўлаётгандек.

Охирги уч учрашув Яқин Шарқдаги урушга, уни тугатишга алоқадор одамлар билан ўтказилгани нимани англатишини эса тўғриси билмадим. Аниғи шуки, Путин аллақачон Америка ва бошқа давлатларнинг урушни тугатиш бўйича чақириқларига жиддий эътибор бераётгани йўқ. Стивен Уиткофф каби мулозимлар эса буни тушунмаяпти.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.