2025 йил биринчи чорагида 4,7 минг киши озодликдан маҳрум қилинди

Январь–март ойларида Ўзбекистон бўйлаб жиноят судларида қарийб 20 мингга яқин иш кўрилган бўлиб, уларда 15 369 нафар шахс судланган. Оқланганлар эса 108 нафарни ташкил қилмоқда. Олий судга кўра, ушбу даврда энг кўп – фирибгарлик, транспортдан фойдаланиш қоидаларини бузиш, ўғрилик ва гиёҳвандликка доир жиноят ишлари кўрилган.

Фото: Олий суд

Олий суд 2025 йилнинг I чораги давомида Ўзбекистондаги жиноят ишлари бўйича судлар томонидан кўрилган ишлар юзасидан статистикани тақдим қилди. Маълум бўлишича, ушбу муддатда 19 минг 646 нафар шахсга нисбатан 15 минг 681 та жиноят иши кўриб чиқилган, 108 нафар шахс оқланиб, реабилитация қилинди.

Судланган шахслар сони 15 369 нафарни ташкил этиб, шундан 4 764 нафар шахсга озодликдан маҳрум қилиш ва 10 319 нафарига бошқа турдаги жазолар тайинланди, 286 нафар шахс шартли ҳукм қилинди. Судланган шахсларнинг 13 611 нафари эркак, 1 708 нафари аёл, 6 066 нафари ёшлар (шу жумладан 702 нафари вояга етмаган) ва 601 нафари 60 ёшдан ошган шахслар.

2 042 нафар шахс озодликдан маҳрум этиш билан боғлиқ бўлмаган жазолар тайинланиши муносабати билан суд залида қамоқдан озод қилинди. Шунингдек, 8 181 нафари жазони ўташдан муддатидан илгари шартли озод қилинди, 2 746 нафарига тайинланган жазоси енгили билан алмаштирилди.

3 765 нафар шахсга нисбатан дастлабки тергов органлари томонидан асоссиз равишда қўйилган моддалар айбловдан чиқариб ташланди ёки қайта малакаланди. 27 нафар шахсга кафолат хатлари асосида озодликдан маҳрум қилиш билан боғлиқ бўлмаган жазолар тайинланган.

Ҳисобот даврида кўрилган жиноий ишларнинг аксариятини:

фирибгарлик;
транспорт воситалари ҳаракати ёки улардан фойдаланиш хавфсизлиги қоидаларини бузиш;
ўғрилик;
гиёҳвандлик воситалари билан боғлиқ жиноятлар;
ўзлаштириш ёки растрата йўли билан талон-торож қилиш;
ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш;
безорилик;
қасддан баданга енгил шикаст етказиш;
қасддан баданга ўртача оғир шикаст етказиш каби жиноятлар ташкил этади.

Шунингдек, ярашув институтининг қўлланиши натижасида 3 429 нафар шахс жиноий жавобгарликдан озод этилди.

Апелляция тартибида 2 706 нафар шахсга нисбатан 2 064 та жиноят иши кўриб чиқилди. 92 нафар шахсга нисбатан биринчи инстанция судлари томонидан чиқарилган қарорлар бекор қилиниб, 825 нафар шахсга нисбатан чиқарилган суд қарорлари ўзгартирилди.

Кассация тартибида 1 523 нафар шахсга нисбатан 1 330 та жиноят иши кўриб чиқилди. 115 нафар шахсга нисбатан биринчи инстанция судлари томонидан чиқарилган қарорлар бекор қилиниб, 475 нафар шахсга нисбатан чиқарилган суд қарорлари ўзгартирилди.

Тафтиш тартибида 1 598 нафар шахсга нисбатан 1 360 та жиноят иши кўриб чиқилди. 46 нафар шахсга нисбатан қуйи инстанция судлари томонидан чиқарилган қарорлар бекор қилиниб, 268 нафар шахсга нисбатан чиқарилган суд қарорлари ўзгартирилди.

Олий суднинг Жиноят ишлари бўйича судлов ҳайъати томонидан тафтиш тартибида 286 нафар шахсга нисбатан 240 та жиноят иши кўриб чиқилди. 58 нафар шахсга нисбатан қуйи судлар томонидан чиқарилган қарорлар бекор қилиниб, 87 нафар шахсга нисбатан чиқарилган суд қарорлари ўзгартирилди.

#Олий суд #жиноят иши