Зеленский Трампга Россия—Украина урушини тугатиш бўйича янги таклифлар юборилганини маълум қилди

Украина президенти Володимир Зеленский Жанубий Африка Республикаси президенти билан биргаликда ўтказилган қўшма матбуот анжуманида Россия билан урушни тўхтатиш бўйича ҳар қандай тинчлик сулҳи Украина Конситуциясига зид бўлмаслиги кераклигини маълум қилди. Унинг сўзларига кўра, Лондондаги учрашувда муҳокама қилинган янги таклифлар аллақачон АҚШ президенти Доналд Трамп томонидан кўриб чиқилмоқда.

«Ушбу формат, ҳужжат Трампнинг столида ётибди деб ўйлайман. Қадриятларимиз ёки Украина Конституциясига зид бўлган нарсалар ҳеч бир келишувнинг бир қисми бўла олмайди», — дейди Зеленский.

Давлат раҳбарининг тушунтиришича, Қримни Россиянинг бир қисми сифатида тан олиш тўғрисидаги АҚШ режасига муқобил таклиф пайдо бўлган. Унинг таъкидлашича, Лондонда Украина делегацияси, европалик шериклар ва АҚШ вакиллари иштирокида конструктив музокаралар бўлиб ўтган.

«РБК-Украина» манбасига кўра, Лондондаги музокаралар давомида «тегишли ҳужжат» келишиб олинган бўлиб, АҚШ президентининг Россия ва Украина бўйича махсус вакили Кет Келлог уни Вашингтонга олиб кетган. «У [ҳужжат] европаликлар — Франция, Буюк Британия, Германия ва Украинанинг уруш бўйича умумий қарашларини ўз ичига олади», — дейди манба.

23 апрел куни Лондонда Украина, Буюк Британия, Франция ва Германия вакиллари иштирокидаги музокаралар бўлиб ўтди. Унда учрашув иштирокчилари «АҚШ президенти Доналд Трампнинг тинчлик йўлидаги саъй-ҳаракатларига» содиқликларини билдириб, келгусида мунтазам маслаҳатлашувлар ўтказишга келишиб олган.

Учрашувда АҚШ давлат котиби Марко Рубио Киев ва Европадаги иттифоқчиларга Трампнинг тинчлик режасини тақдим этиши кутилаётганди. Аммо Рубио Зеленский «Украина Қрим оккупациясини юридик жиҳатдан тан олмаслигини» айтганидан кейин музокарада иштирок этишдан бош тортди.