Стивен Уиткофф тўртинчи бор Путин билан учрашди

Россия президенти матбуот котиби Дмитрий Песковнинг тасдиқлашича, Уиткофф Кремлда Россия президенти Владимир Путин билан учрашган. Россия томонидан музокараларда президент ёрдамчиси Юрий Ушаков ва инвестициявий-иқтисодий ҳамкорлик бўйича махсус вакил Кирилл Дмитриев ҳам иштирок этди.

Кремлдаги учрашувдан олдин Уиткофф Дмитриев билан биргаликда Москва маркази бўйлаб «кичик сайр уюштиришди», деб хабар берди «Интерфакс».

Уиткофф — АҚШ томонидан Россия билан бош музокарачи. У Путин билан тўртинчи бор учрашмоқда, охирги учрашув 11 апрел куни Санкт-Петербургда ўтказилганди.

Москва Доналд Трампнинг тинчлик режасига қандай муносабатда экани узил-кесил аниқ эмас. Унинг айрим бандлари бўйича на расмий шахсларнинг баёнотлари даражасида, на оммавий ахборот воситаларида жиддий сиздиришлар кўринишида изоҳлар мавжуд эмас. Дмитрий Песков мунтазам равишда шуни таъкидлаб келмоқда: Москвадагилар музокаралар ёпиқ форматда ўтиши керак, деб ҳисоблашади. Сўнгги ҳафталарда Песков бир неча бор эълон қилган ягона позиция – Москва Европа Украина ҳудудида тинчликпарвар кучларини жойлаштиришига рози эмаслиги ҳақида.

Американинг СBS телеканали 24 апрел куни РФ ТИВ раҳбари Сергей Лавровнинг интервюсидан парча келтирди (суҳбат айнан қачон бўлиб ўтгани номаълум). Эълон қилинган парчада Лавров Трампнинг томонлар «тўғри йўналишда кетаётгани» ҳақидаги фикрига қўшилган. Вазир РФ «битим тузишга тайёрлиги», аммо «қайта ишлаш» зарур бўлган жиҳатлар борлиги ва ҳозирда томонлар айнан шу билан банд эканини айтган. CBS интервюсининг тўлиқ версияси якшанба куни намойиш этилиши режалаштирилган.