«Титаник» йўловчиси ёзган мактуб 300 минг фунтга сотилди

Мактуб полковник Арчибалд Грейси томонидан ёзилган бўлиб, унга 1912 йил 10 апрел санаси туширилган.

Фото: Henry Aldridge & Son/PA

«Титаник» йўловчиси бўлган полковник Арчибалд Грейсининг мактуби аукцион орқали 300 минг фунт стерлингга сотилди, деб ёзади The Guardian. Кимошди савдоларидан олдин лот беш баробар арзонга сотилиши кутилаётган эди.

Қайд этилишича, бу чўкиб кетган кема бортидан туриб ёзилган мактубларнинг энг қимматига айланган.

Ушбу мактуб биринчи марта намойиш этилган. Унга 1912 йил 10 апрел санаси туширилган — шу куни Грейси «Титаник» бортига кўтарилган. «Бу жуда ажойиб кема, аммо у ҳақида хулоса чиқаришдан олдин саёҳатим охирини кутаман», — деб ёзади полковник. Мактуб уни кимошдига қўйган одамнинг бобосининг акасига йўлланган бўлиб, у ўша вақтда Лондондаги Waldorf меҳмонхонасида яшаган.

Арчибалд Грейси — «Титаник»нинг энг машҳур йўловчиларидан бири. Кема ҳалокатга учраганидан кейин полковник ҳалокат ҳақида китоб ёзишни бошлаган. У омон қолган ўнлаб йўловчилардан хотиралар тўплаган. «Титаник» ҳақида ҳақиқат» номли китобни ҳозирги кунда ҳам харид қилиш мумкин. Арчибалд Грейси 1912 йил 4 декабрда, ҳалокатдан қарийб саккиз ой ўтиб вафот этган.

Аввалроқ «Титаник»нинг 700 дан ортиқ йўловчисини қутқарган Британия пароходи капитанига совға қилинган тилла соат аукцион орқали 1,56 миллион фунт стерлингга сотилганди. Соатни америкалик хусусий коллекционер харид қилган.

#мактуб #Титаник