Австралия Украина учун Abrams танкларини етказиб беришни кечиктирди

Бунга АҚШ томони танкларнинг Украинага юборилишига ҳали розилик бермагани сабаб бўлмоқда. Австралия М1А1 Abrams танкларидан шу пайтгача жанговар ҳаракатларда фойдаланмаган.

Фото: Australian Defence Force

Австралия 49 та М1А1 Abrams танкларини учинчи томонга бериш учун рухсат ололмаяпти, шу боис зирҳли техникаларни Украинага юбориш кечикмоқда, деб хабар беради ABC телеканали.

Халқаро қурол савдоси қоидаларига мувофиқ, Америка томонидан ишлаб чиқарилган бу турдаги техникаларни АҚШ розилигисиз учинчи томонга бериш мумкин эмас. Телеканал Украина Қуролли кучларига (УҚК) танкларни юбориш билан боғлиқ жараёнлардаги муаммо ҳақида 2025 йил март ойида хабар берганди. Ўшанда ABC суҳбатдоши кечикишларни АҚШ президенти Доналд Трампнинг Украинага ҳарбий ёрдам кўрсатишни музлатиш тўғрисидаги қарори билан боғлашган эди.

Abrams партияси Австралиянинг УҚКни қўллаб-қувватлаш бўйича 2024 йил октябрдаги ёрдам пакетига киритилган. Уларнинг қиймати 245 миллион долларни ташкил этади. Ўшанда ушбу пакетнинг бир қисмига айланган танкларнинг барчаси ҳам фойдаланишга яроқли эмаслиги ва зарурат туғилса, улар эҳтиёт қисмларга ажратилиши мумкинлиги айтилган эди.

Телеканал материалида М1А1 Abrams танклари «эскирган» дея таърифланади. Унинг асосий камчилиги — дронлар ҳужумига бардошли эмаслиги. Австралияда бу каби техникадан жами 59 та бор. Аммо улар 2007 йилда йиғилганидан бери ҳеч қачон жанговар ҳаракатларда фойдаланилмаган. Ҳозирда Канберра 120 миллиметрли қуролга эга М1А2 моделидаги янги 75 та танк келишини кутмоқда.

#Австралия #Abrams