Киев суди Украина собиқ президенти Виктор Януковични сиртдан 15 йилга ҳукм қилди

Киевнинг Подолск туман суди Украинанинг собиқ президенти Виктор Янукович ҳамда унга яқин бўлган шахсларни 2014 йил феврал ойида Россияга қочиб кетиш иши бўйича 15 йил муддатда озодликдан маҳрум этиш ҳукмини чиқарди.

Суд Януковични одамларни ноқонуний равишда Украина давлат чегарасидан ўтказишни ташкил қилганликда ва дезертирликка ундаганликда айбдор деб топган.

Януковичнинг собиқ хавфсизлик хизмати бошлиғи Константин Кобзар эса одамларни ноқонуний равишда чегарадан ўтказишни ташкил қилиш ва дезертирликда айбланиб, 10 йил муддатга озодликдан маҳрум этилди.

Подолск туман суди кўриб чиққан иш собиқ Украина президенти Януковичнинг 2014 йил 23 феврал куни Россияга қочиб ўтиши билан боғлиқ. Янукович ва Кобзар ҳаво йўли орқали Украина чегарасини ноқонуний кесиб ўтганликда ва собиқ президентнинг яқин атрофидагилар ҳамда унинг хавфсизлик ходимларидан камида 20 нафарини чегарадан ноқонуний ўтказишни ташкил қилиш орқали уларни дезертирликка ундаганликда айбланган.

11 йилдан ошиқ вақтдан бери Россияда яшириниб юрган Янукович учун бу — Украина суди томонидан сиртдан чиқарилган иккинчи суд ҳукми ҳисобланади. 2019 йил январ ойида Янукович давлатга хиёнат ва тажовузкор уруш олиб боришга кўмаклашганлик бўйича 13 йилга озодликдан маҳрум қилинган эди.