WP: Зеленский ва Трампнинг келишуви Россия элитасини чўчитиб юборди

Икки ойлик кескин музокаралардан сўнг АҚШ ва Украина ўртасидаги табиий ресурсларни ўзлаштириш бўйича келишув Москвани асабийлаштирди, Россия элитаси аъзолари Володимир Зеленский ва Доналд Трамп ўртасидаги яқинлашувдан қўрқяпти ҳамда Кремль Украина бўйича фойдали келишувга эришиш имкониятини қўлдан бой бериши мумкин, деб ҳисоблайди, деб ёзади The Washington Post (WP) 2 май, жума куни манбаларга таяниб.

Россия президенти Владимир Путинга ҳеч бўлмаганда ён беришга тайёр бўлиб кўриниши учун босим кучаймоқда, деди россиялик амалдор ўз шахсини ошкор қилмаслик шарти билан нашрга. Унинг сўзларига кўра, акс ҳолда Россия сенатор Линдси Грэм томонидан тайёрланган Америка санкцияларининг янги пакетига дуч келади. Улар жиддий зарба бўлади, чунки бюджет тақчиллиги ўсиб бормоқда, деб ҳисоблайди WP манбаси.

Расмийнинг таъкидлашича, Россия санкцияларни муваффақиятли енгиб чиқди, деб даъво қилаётган амалдорларнинг жасоратига қарамай, иқтисодиётнинг аҳволи билан боғлиқ хавотирлар тобора муҳим роль ўйнамоқда. "Иқтисодиётни фақат сафарбарлик модели асосида қуриш мумкин эмас", деди у.

Россияда иқтисодий ўсиш суръати аллақачон кескин секинлашди: жорий йилнинг биринчи чорагида ЯИМ ўтган чоракдаги 4,5 фоиз ва ўтган йилги умумий 4,1 фоиздан кейин атиги 1,7 фоизга ошди. Россия Федерацияси Марказий банкининг рекорд фоиз ставкасига қарамай, инфляция даражаси 10 фоиздан юқори бўлиб қолмоқда, ҳарбий-саноат комплексига кирмайдиган тармоқлар таназзулга юз тутди, нефть нархининг пасайиши бюджетнинг хомашё даромадларини деярли 20 фоизга камайтирди. Энди Молия вазирлиги дефицит пандемиядан кейинги энг юқори кўрсаткич бўлишини башорат қилмоқда — режалаштирилган 1,2 триллион ўрнига 3,8 триллион рубль.