Бразилия полицияси Леди Гага концертидаги терактнинг олдини олди

Хонанданинг Копакабана пляжидаги бепул концерти икки миллиондан ортиқ одамни йиғди. Полиция у ерда қўлбола бомбаларни портлатишни режалаштирганини айтди. Теракт ташкилотчиси деб тахмин қилинган шахс ва ўсмир қўлга олинди.

Фото: Philipp Znidar/dpa/picture alliance

Бразилия полицияси америкалик қўшиқчи Леди Гаганинг 3 май, якшанба куни Рио-де-Жанейродаги Копакабана пляжида бўлиб ўтган текин концертида теракт содир этилишининг олдини олганини маълум қилди.

Ҳуқуқ-тартибот идоралари вакилларининг сўзларига кўра, жиноятчилар қўлбола портловчи мосламалар ва молотов коктейлидан фойдаланиши керак бўлган ўсмирларни ўз сафига жалб қилган. Полиция амалиёти доирасида икки киши – режалаштирилган ҳужум ташкилотчиси ва ўсмир йигит қўлга олинди. Биринчиси Рио Гранде-ду-Сул штатида ўқотар қуролни ноқонуний сақлагани учун, иккинчиси Риода болалар порнографиясини сақлагани учун ҳибсга олинган.

Полициянинг таъкидлашича, ҳужумларни режалаштирган гуруҳ ўсмирларни радикаллаштириш ва нафратни қўзғатиш билан шуғулланган. Терактга тайёргарлик чоғида унинг ташкилотчилари қўшиқчининг халқаро мухлислар ҳамжамияти бўлмиш Little Monsters аъзоси сифатида ўзини таништиришган.

Леди Гаганинг Копакабана пляжидаги концерти бепул бўлиб, хонанданинг ўзи ёзганидек, унга 2 миллиондан ортиқ одам ташриф буюрган. Тадбир учун шаҳар иқтисодиётини жонлантиришга умид қилган маҳаллий ҳокимиятлар тўлаган. Концертдан 100 миллион доллар йиғилиши кутилмоқда.

#Бразилия #теракт #Леди Гага