Америкалик кардинал янги Рим папаси этиб сайланди

Америкалик кардинал Роберт Прево — янги Рим папаси. У ўзига Лев XIV исмини танлади. Роберт Прево тарихдаги биринчи америкалик понтификка айланди.

Фото: AP

Америкалик Роберт Прево янги Рим папаси этиб сайланди, деб хабар беради CNN.

Рим-католик черковига раҳбар сайлаш учун Ватиканда конклавга тўпланган кардиналлар янги Рим папаси ким бўлишига келишиб олди. Роберт Прево тарихдаги биринчи америкалик понтификка айланди. У ўзига Лев XIV исмини танлади.

Кардинал Роберт Френсис Прево 69 ёшда. У асосан Жанубий Америка давлатларида фаолият юритган ва яқинда епископларни тайинлаш бўйича Ватикандаги офисга раҳбар этиб тайинланган эди. Прево ўн йил давомида Перуда ишлаган, кейин эса Чикклаё шаҳри епископи этиб тайинланган. У Франциск амалга оширган ишларни давом эттириши кутилмоқда.

Рим папаси Франциск 21 апрел куни 88 ёшида вафот этганди. У 2013 йил март ойида сайланиб, соғлиғидаги муаммолар туфайли папаликдан кетган Бенедикт XVI нинг ўрнини эгаллаган.

Конклав давомида янги Рим папасини сайлаш бир неча соатдан бир неча кун, ҳафта ва ҳатто ойгача давом этиши мумкин. Католиклар тарихида энг узоқ давом этган конклав XIII асрда ўтказилган — кардиналларга папа Климент IV нинг ворисини сайлашга 1006 кун талаб этилган. Энг қисқа конклав эса бир неча соат давом этган — бу 1503 йилда Юлий II нинг сайлови эди.

#Рим папаси #конклав #Роберт Прево