Москва ва Вашингтон Россия газини Европага етказиб беришни тиклаш вариантини муҳокама қилмоқда

Вашингтон ва Москва вакиллари Россия газини Европага етказишни тиклаш имконияти бўйича музокаралар ўтказди. Бу ҳақда Reuters ўз манбаларига таяниб хабар берди.

Агентлик суҳбатдошларининг сўзларига кўра, «Москванинг ЕИ газ бозоридаги ролини тиклаш РФ президенти Владимир Путин билан тинчлик сулҳини мустаҳкамлашга хизмат қилиши мумкин». Газ етказиб беришни тиклашда АҚШнинг иштироки Россияга Европада «сиёсий қаршиликларни» енгишга, Вашингтонга эса таъминот ҳажмини назорат қилиш имкониятини бериши мумкин.

Доналд Трампнинг махсус вакили Стив Уиткофф ва РФ президентининг хориж давлатлари билан инвестиция-иқтисодий ҳамкорлик бўйича махсус вакили Кирилл Дмитриев Россия—Украина урушини тўхтатиш бўйича музокаралар давомида газ етказиб бериш масаласини ҳам муҳокама қилган.

Музокаралар давомида Москва ва Вашингтон вакиллари томонидан АҚШдаги инвесторларнинг «Шимолий оқим» ёки «Газпром» билан боғлиқ лойиҳалардаги иштироки ҳам муҳокама қилинган. Вариантлардан бири сифатида Россия газини Америка компанияси сотиб олиши, кейин эса уни Европага импорт қилиш имконияти кўриб чиқилмоқда.

Манбаларнинг таъкидлашича, «Европага газ етказиб беришни тиклашга уринаётган» «Газпром» Германиядаги мижозларига икки йиллик шартнома ва сезиларли даражада чегирмалар таклиф қилиши мумкин. Россия компаниясида одатда харидорлар билан ўнлаб йиллик шартномалар тузади.

Уруш бошлангунга қадар Европа Иттифоқига етказиб бериладиган газнинг қарийб 40 фоизи Россия ҳисобига тўғри келган, энг йирик импортчи эса Германия бўлган. 2024 йилда ушбу улуш 10 фоизни ташкил этди, 2025 йил январда Украина Россия гази транзитини тўхтатиб қўйганидан кейин яна икки баробарга қисқариб кетди.

Январь ойида Financial Times Европа Иттифоқидаги амалдорлар ЕИ давлатлари Россия газини харид қилишни тиклаш имкониятини муҳокама қилишни бошлагани ҳақида ёзганди. Музокаралардан хабардор учта манбанинг айтишича, ушбу ғояни Германия ва Венгриядаги айрим амалдорлар маъқуллаган.