Трамп Зеленский билан қўнғироқлашди

АҚШ ва Украина президентлари Доналд Трамп ва Володимир Зеленский 8 май куни кечқурун телефон орқали мулоқот қилди.

Зеленскийнинг сўзларига кўра, суҳбат чоғида улар Олий Рада АҚШ билан фойдали қазилмалар бўйича келишувни ратификация қилганини, шунингдек, «тинчлик учун қўшимча саъй-ҳаракатлар зарурлиги»ни муҳокама қилган. Зеленский суҳбат чоғида Украина «бугундан бўлса ҳам» 30 кунлик оташкесимга тайёрлиги ва Россия бу таклифга рози бўлишини кутаётганини таъкидлади.

«Мен, шунингдек, Украина ҳар қандай форматдаги музокараларга тайёрлигини тасдиқладим. Аммо бунинг учун Россия урушни тўлиқ ва сўзсиз ўт очишни тўхтатиш билан якунлаш ниятининг жиддийлигини кўрсатиши керак. Президент Трамп бу уруш тугашини исташини, ёрдам беришга тайёрлигини ва ўт очишни тўхтатиш зарурлигини қўллаб-қувватлашини тасдиқлади», – дейди Зеленский.

АҚШ президенти Доналд Трамп эса Truth Social ижтимоий тармоғида Россия ва Украина билан музокаралар давом этаётгани ҳақида ёзди. «АҚШ, идеал ҳолатда, 30 кунлик сўзсиз ўт очишни тўхтатишни талаб қилмоқда. Умид қиламизки, мақбул ўт очишни тўхтатиш режимига риоя қилинади ва ҳар икки давлат ушбу тўғридан тўғри музокараларнинг дахлсизлигига риоя қилиш учун масъул бўлади. Агар ўт очишни тўхтатишга риоя қилинмаса, АҚШ ва унинг ҳамкорлари қўшимча санкциялар киритади», – деган Трамп.

Унинг сўзларига кўра, вақтинчалик ўт очишни тўхтатиш охир-оқибат тинчлик келишувига олиб келиши керак. «Буларнинг барчасини жуда тез амалга ошириш мумкин», – деди АҚШ президенти.

Аввалроқ, 8 май куни Трамп АҚШ Украина билан фойдали қазилмалар бўйича келишув жараёни охирига етказилгани муносабати туфайли Зеленский билан гаплашмоқчи эканини маълум қилганди.