Вэнс: Россия музокараларда жуда кўп нарса сўрамоқда

АҚШ вице-президенти Жей Ди Вэнс Россиянинг Украинадаги урушни ҳал қилиш бўйича музокаралар чоғида қўйган талабларини «жуда катта» талаблар деб атади.

«Биз Россия жуда кўп нарса сўрашини билардик, чунки Россиянинг уруш ҳақидаги тасаввури уларнинг қўли баланд келаётганига асосланган. <…> Аммо Россия ҳали ҳатто босиб ололмаган ҳудудларини унга беришларига умид қилмаслиги керак. Бу эса уларнинг дастлабки тинчлик режасига киритилган бандлардан биридир», – деган Вэнс 8 май куни Fox News телеканалига берган интервюсида.

АҚШ вице-президенти Вашингтондагилар Россия ўзининг биринчи таклифида «мумкин бўлганидан кўп нарса» сўрашини тахмин қилгани, чунки «музокаралар кўпинча шундай ўтиши»ни айтиб ўтган.

Вэнс Россия ва Украина музокараларда қатнашиб, «аниқ тинчлик режалари»ни таклиф қилаётганини ўсиш деб атади. Шу билан бирга, у агар АҚШ «руслар музокараларда чин дилдан қатнашмаяпти» деб топса, музокаралардан чиқишини яна бир бор таъкидлади.

«Агар шундай бўлса, ҳа, биз кетамиз. Президент бу ишдан чиқиб кетаётганимизни айтади. Бу эса, менимча, Россия ҳам, Украина ҳам АҚШнинг маслаҳати ва воситачилигисиз ёлғиз қолишини англатади», – деган у.

Жей Ди Вэнс Россия-Украина урушини ҳал қилишда «баъзи дипломатик ютуқлар бор» деб ҳисоблашини қўшимча қилган. «Биз барқарор тинчликка эришиш учун бу томонларни яна бироз яқинлаштиришга ҳаракат қилишимиз керак. Биз ҳали бунга эришганимиз йўқ. Биз энди тараққиётга эриша олмаймиз, деган қарорга келмагунимизча, бу борада ишлашда давом этамиз», – деди Вэнс.

АҚШ вице-президенти Жей Ди Вэнс 1 май куни АҚШ кейинги 100 кун ичида Россия ва Украина ўртасида музокаралар ўтказишга ҳаракат қилишини айтди. Вэнс 7 май куни Мюнхен хавфсизлик конференцияси томонидан ташкил этилган форумда сўзлаган нутқида АҚШ 30 кунлик сулҳ ғоясидан воз кечиб, узоқ муддатли келишув масалаларига эътибор қаратишга ҳаракат қилаётганини айтди.