Лондонда олти болгар Россия фойдасига жосуслик қилганлик учун қамалди

Британияда яшовчи ва Россия номидан бутун Европа бўйлаб жосуслик амалиётида иштирок этганликда айбдор деб топилган олти нафар болгариялик 5 йилдан 10 йилгача қамоқ жазосига ҳукм қилинди. Ҳукмлар 12 май, душанба куни Лондондаги Олд Бейлида чиқарилди.

Гуруҳнинг 47 ёшли етакчиси Орлин Русев ўз айбига иқрор бўлди ва Буюк Британияда миллий хавфсизлик ва аҳоли хавфсизлигига таҳдид соладиган олтита «мураккаб» операцияда иштирок этгани учун 10 йил-у 8 ойга қамалди, деб ёзади The Guardian газетаси.

Унинг шериги, 44 ёшли Бизер Жамбазов ҳам ўз айбига иқрор бўлди, у 10 йил-у икки ойга озодликдан маҳрум этилди. Ўз қурбонларини тузоққа туширган гуруҳ аъзоси 33 ёшли Катрин Иванова 9 йил-у 8 ойга озодликдан маҳрум этилди.

Яна бир аёл, 30 ёшли Вана Габерова олти йил, саккиз ой ва уч ҳафтага қамалди. Судья унинг клаустрофобия ташхисини инобатга олди, лекин у ўз миссиясини «ҳаяжонли ва жозибали» деб топганини билдирди.

Суд ҳукмига кўра, 39 ёшли Тихомир Иванчев саккиз йилни панжара ортида ўтказиши керак бўлади. Суд унинг намунали хулқ-атвори ва жиноий ҳамжамиятга алоқадорлиги 2023 йилда ҳибсга олинишидан олдин тўхтаганини таъкидлади. Тармоқнинг сўнгги аъзоси 33 ёшли Иван Стоянов беш йил-у уч ҳафта қамоқ жазосига ҳукм қилинди. У ўз айбини тан олди, аммо судьянинг сўзларига кўра, у буни жуда кеч қилган.