Навоийда 55 ёшли аёл ҳужжатларда эркак сифатида қайд этиб келингани аниқланди

Қизилтепа туманида яшовчи Эркиной Тилавова пенсияга чиқмоқчи бўлганида ғаройиб муаммога дуч келди: унинг “метрика”сига Эркин Тилавов исми ёзилгани, жинси эса эркак сифатида кўрсатилгани маълум бўлди. Туғилганлик гувоҳномасидаги бу чалкашликни ўша пайтда ота-она ручкада бўяб, тузатиб қўйишган. Аммо бу хатолик тизимда тузатилмасдан қолиб кетган.

Фото: Видеодан кадр

Навоий вилоятининг Қизилтепа туманида 55 ёшли аёл ҳужжатларда эркак сифатида қайд этиб келингани аниқланди. Бу ҳақда Davr дастурида хабар берилди.

Маълум бўлишича, ҳолат Навоий вилояти Адлия бошқармаси томонидан ўтказилган «Ҳеч бир шахс ҳужжатсиз қолмайди» акцияси доирасида аниқланган. Қизилтепа туманида яшовчи Эркиной Тилавованинг туғилганлик ҳақидаги гувоҳномасига исми Эркин Тилавов ҳамда жинси эркак сифатида ёзилган. Аёл пенсияга чиқиш пайтида ушбу хатолик туфайли муаммога дуч келган.

“Пенсияга чиқиш учун ҳужжат тайёрлаб юргандим, архивдан Тилавов Эркин чиқди. “Метрика”нгиз чалкаш дейишди. Шу пайтгача ҳужжатларга ишим тушмаганди”, деган Эркиной Тилавова.

Қизилтепа тумани ФҲДЁ бўлими мудираси Маруса Носирова хато “метрика” билан фуқаролик паспорти ҳам олинганини билдирган.

“Биз электрон тизим ва Эркиной Тилавова қўлидаги ҳужжатларни таққослаб кўрганимизда фуқаронинг туғилиш далолатнома ёзувларида эркак жинсли фарзанд туғилгани, фамилияси Тилавов ва исми Эркин экани тўғрисида маълумотлар ёзилгани аниқланди. Ҳужжатга ота-онанинг ўзлари тузатиш киритиб қўйишган ва бу билан фуқаролик паспорти олинган. Бугунги кунда электрон тизим бўлгани сабабли муаммога дуч келишган”, деган Маруса Носирова.

Ҳолат юзасидан Қизилтепа тумани Адлия бўлими томонидан ФҲДЁ ҳамкорлигида судга фуқаролик фактини белгилаш бўйича даъво аризаси киритилган.

#Навоий #ҳужжат