Самарқандда Кувайт бизнес маркази очилиши мумкин

Ўзбекистоннинг хориждаги дипломатик ваколатхоналари раҳбарлари сафар давомида вилоят раҳбарияти, ишбилармон доиралари вакиллари билан учрашувлар ўтказди ва етакчи корхоналар фаолияти билан танишди.

Хусусан, Самарқанд вилоят ҳокими вазифасини бажарувчи Адиз Бобоев билан кечган мулоқот чоғида хорижий мамлакатларда вилоятнинг савдо-иқтисодий, инвестициявий ва туризм имкониятларини кенг тарғиб қилиш, салоҳиятли инвесторларни жалб этиш, ҳудудда етиштирилган ва ишлаб чиқарилган маҳсулотлар экспорти ҳажмини янада ошириш тўғрисида фикр алмашилди.

Самарқанд вилоят раҳбари хорижий давлатлар билан савдо-иқтисодий ва инвестициявий ҳамкорликни жадаллаштириш учун мавжуд имкониятлар, инфратузилма ва логистика ҳақида батафсил маълумот берди. Таълим соҳасида илм-фанни янада ривожлантириш бўйича чет давлатлар билан ҳамкорлик қилиб, уларнинг тажрибаларини ўрганиш зарурлигини таъкидланди. 

Самарқанд вилояти ва хорижий мамлакатлар ўртасида инвестициявий ҳамкорликни чуқурлаштириш, савдо-иқтисодий муносабатлар, таълим, туризм ва қишлоқ хўжалиги соҳаларидаги истиқболли дастурларни амалга оширишга алоҳида эътибор қаратилди. 

Ўзбекистонинг Беларусдаги элчиси Раҳматулла Назаров Самарқанд вилоятининг Беларусь билан ҳамкорлигини яна ривожлантириш бўйича бир қатор таклифларни илгари сурди. Жумладан, сут маҳсулотлари, қишлоқ хўжалиги жиҳозлари ишлаб чиқарувчилар билан қўшма кластерлар очиш, Самарқанддан полиз маҳсулотларини ушбу давлат бозорига етказиб бериш ва бунинг учун логистикани ривожлантириш, Самарқанд ва Минск университетлари билан талабалар алмашинуви, илмий лойиҳалар бўйича иш олиб бориш, Минск – Самарқанд йўналишида авиақатновларни ташкил этиш истиқболли йўналишлар сифатида қайд этилди.

Ўзбекистоннинг Уммондаги элчиси Абдусалом Ҳотамов Самарқанднинг туризм соҳасидаги салоҳияти ва мавжуд имкониятларини султонликда кенг тарғиб этишга эътибор қаратди. "Чунки, Уммонда юртимиздаги тарихий-маданий ёдгорликлар, муқаддас масканларга қизиқиш жуда юқори. Агар Маскат –Самарқанд йўналишида доимий ёки мавсумий чартер авиақатновлар йўлга қўйилса, бу қулай имконият бўлади. Шунингдек, уммонлик туроператорлар учун Самарқандга инфо-турлар ташкил этиш, сайёҳларга махсус турпакетлар таклиф этиш ҳам ўз самарасини бериши табиий", деди элчи.

Кувайтдаги элчи Аюб Юнусов Самарқандда "Кувайт бизнес маркази" очиш, Кувайт фонди билан вилоятда инфратузилма, йўл қурилиши, сув таъминоти ва соғлиқни сақлаш соҳаларида лойиҳаларни молиялаштириш таклифини билдирди. "Кувайт университетлари билан ҳамкорликда Самарқандда исломшунослик, ҳуқуқшунослик ва тиббиёт йўналишларида қўшма таълим дастурларини очиш бўйича ҳам таклифлар бор", деди элчи Аюб Юнусов.

Мулоқот якунида билдирилган таклифлар асосида "Йўл харитаси" ишлаб чиқишга келишиб олинди.