Криптофирибгарлар Telegram орқали 27 млрд доллар пул ювгани маълум бўлди

Haowang Guarantee платформаси Telegram орқали учинчи томон сотувчиларга кенг кўламдаги ноқонуний хизматларни таклиф қилиш имконини берган. Мессенжер унга алоқадор каналларни блоклади.

Фото: Zuma / TASS

Интернетда криптовалютадан фойдаланган ҳолда пул ювиш билан шуғулланган энг йирик майдонча — Haowang Guarantee ўз фаолиятини якунлаганини эълон қилди. Эълон Telegram 13 май куни криптовалюта фирибгарлигига боғлиқ минглаб аккаунтларни, жумладан, Haowang Guarantee каналини блоклаганидан кейин сервис сайтида пайдо бўлган.

Ушбу майдонча йиллар давомида криптофирибгарларга хизмат кўрсатган ва пул ювиб келган. Elliptic таҳлилчилари маълумотларига кўра, у орқали 27 миллиард доллардан ортиқ яширин транзакциялар амалга оширилган. Унга эгалик қилувчи компания Камбоджада рўйхатдан ўтган ва Al Jazeera маълумотларига кўра, қироллик оиласи ва мамлакат ҳукуматига боғлиқ бизнесларга алоқадор. Платформани ўз ичига олган Huione Group молиявий конгломерати Камбоджа бош вазири Ҳун Ман билан боғлиқ тузилмаларни назорат қилади. Ушбу тузилма директорларидан бири унинг амакиваччаси Ҳун То бўлиб, Al-Jazeera суриштирувида фирибгарлик марказининг иштирокчиси сифатида тилга олинган.

Тўсатдан ёпилгунга қадар Haowang Guarantee Telegram орқали учинчи томон сотувчиларга кенг кўламдаги ноқонуний хизматларни таклиф қилиш имконини берган. Депозит ва эскроу тизими орқали платформа иштирокчилари битимларни «кафолатлашган», асосан Tether криптовалютасида пул ювиш операцияларини амалга оширган. Шунингдек, у ерда фирибгарлар учун маълумотлар базалари, телекоммуникация ускуналари, дипфейклар учун дастурий таъминотлар, ҳатто GPS-бўйинбоғ ва электрошокерлар ҳам таклиф қилинган — буларнинг барчаси Мянма, Камбоджа ва Филиппиндаги фирибгарлик марказларида қулликда ишлатиладиган меҳнат лагерларида қўлланган.

Wired маълумотларига кўра, Telegramʼнинг аккаунтларни блоклаш борасидаги ишлари криптовалюта операцияларини кузатишга ихтисослашган Elliptic тадқиқот компанияси ўз ўрганишларига оид маълумотларни эълон қилганидан кейин бошланган. Elliptic ўтган йилнинг июлидан бошлаб Haowang Guarantee билан боғлиқ кенг кўламли пул ювиш ва жиноятларни қайд этган. Шунингдек, тадқиқотчилар Telegram базасида яна бир платформани аниқлаган — Xinbi Guarantee номли платформа 2022 йилдан бери 8,4 миллиард долларлик транзакцияларни амалга оширган.

«Бу улкан ғалаба. Шу вақтгача мавжуд бўлган энг йирик даркнет-бозор ёпилди», — дейди Elliptic асосчиларидан бири Том Робинсон.

#Telegram #криптовалюта