“Путинга ёқиш учун айтилган гаплар” — экспертлар Кобяковнинг баёноти ҳақида

“СССР ҳуқуқий жиҳатдан ҳамон мавжуд” деган фитна назарияси бу сафар Россия президентининг маслаҳатчиси Антон Кобяков тилидан янгради. Kun.uz'нинг жонли эфирдаги “Геосиёсат” дастурида сиёсатшунослар Фарҳод Каримов ва Камолиддин Раббимов унинг сўзларига муносабат билдирди.

{Yii::t(}

Ўтказиб юбориш 6s

Ўтказиб юбориш

“Ҳужжатларни қидирсангиз, кўп саволлар чиқади”

Фарҳод Каримов:

— СССР мавжудлиги ҳақида кўпроқ мафкурачилар гапирарди, бугун эса мансабда ўтирган ва марказга яқин сиёсатчилар томонидан айтилиши – шовинистик кайфият ичкарида анчагина авж олганини кўрсатади.

Ҳуқуқий асосларни қидирадиган бўлсак, дунёда унақа ҳуқуқий асослар жуда кўп. Миллионлаб асос келтириш мумкин. Темурийлар давлати тугатилгани ҳақида ҳуқуқий ҳужжат борми, масалан? Бухоро амирлиги, Қўқон ва Хива хонликлари расман тугатилгани ҳақидаги ҳужжатларни тақдим этишсин унда?

Ҳужжатларни қидирсангиз, кўп саволлар чиқади. Шунинг учун қичимаган жойни қашлаш керак эмас. Бундай баёнотлар аксинча яқин иттифоқчиларни Россиядан узоқлаштиришга хизмат қилади.

СССР конституциясида республикалар истаган пайтда мустақил бўлиб кетиши белгиланган эди. 1920 йилдаги баённома ҳақида гапириляпти, ахир Конституция бор эди-ку. Ҳамма давлат Конституцияда белгиланган ўз ҳуқуқидан фойдаланиб мустақил бўлиб келди. Бу ерда ҳуқуқий савол қолмаган.

“Путинга ёқиш учун берилган баёнот”

Камолиддин Раббимов:

— Бундай баёнотлар Путиннинг кайфиятидан келиб чиқиб берилади. Путин – империалист. У КГБда ишлаган, энг гуллаган ёшлик даврида кутилмаганда СССР парчаланган. Путин буни оғир қабул қилган. Совет пайтида дунё сиёсий харитасига қарасангиз, баҳайбат СССРнинг олдида қолган давлатлар жуда кичкина бўлиб кўринарди. Путин “биз дунёнинг энг қудратли давлати эдик” деган қарашга эга. У СССРнинг қулашини ХХ асрнинг энг катта геосиёсий фожиаси деган.

Империялар ҳам одамга ўхшайди. Катта бир ҳукмдор, ҳоким ҳокимиятда бўлган пайтида ҳар куни уйига совға-саломлар, қўйлар, тандир гўштлар келиб туради, мулозамат сифатида, ишдан бўшаганидан кейин эса эр-хотин буларни эслаб юришади. Постимпериалистик синдромдан Франция ҳам ўтган, Англия ҳам ўтган. Ҳозир Ҳиндистон Англияга айтяпти: сен мени асрлар давомида таладинг, вақти келади, барибир ундираман. Англия қиролларининг тожидаги катта олмослардан бири Африкадан келтирилган, иккинчиси эса Бобурийларга тегишли бўлган Кўҳинур. Вақти келади, куч ишлатиш қийин бўлиб қолган пайтда, ўйлайманки. бу ҳисоб-китоблар албатта бўлади. Жумладан, биз ҳам Россия билан ҳисоб-китоб қиламиз. Албатта, ҳозирги Россия билан гаплашиш қийин, лекин вақти келади

Амалдорлар Путинга ёқиш учун, мавқейини мустаҳкамлаш учун мана шундай баёнотлар бериб туради. Масалан, энг маргинал баёнотлар бераётган Мария Захарова. Унинг мавқейи жудаям кучли. Путиннинг рухсатисиз Захаровани ҳеч ким ишдан ололмайди. Кимдир “Мария Захаровани ишдан олиш керак” дейдиган бўлса, Путин нима учун дейди. Чунки у Путин нимани ёқтиришини билади. Қанчалик агрессив баёнот берса, Путинга шунча ёқади. Путин эса расман “бу давлатимизнинг позицияси эмас, шунчаки айтган-қўйган” дейди.

***

Эслатиб ўтамиз, куни кеча Россия Тергов қўмитаси бошлиғи Александр Бастрикин Ўзбекистон, Тожикистон ва Қирғизистон фуқаролигига эга бўлган, сўнг РФ фуқаролигини олганлардан 20 минг нафари Украинага қарши урушда қатнашаётганини айтиб, “улар негадир ватанида яшашни ёқтирмайди” дея пичинг қилганди.

Экспертлар суҳбат давомида Яқин Шарқ, АҚШ-Россия муносабатлари, Туркий давлатлар раҳбарларининг навбатдаги учрашуви, Вашингтоннинг “Толибон”га оид сиёсати каби мавзуларни муҳокама қилди.

Суҳбатни тўлиқ шаклда YouTube саҳифамизда томоша қилишингиз мумкин

НормуҳаммадАли Абдураҳмонов суҳбатлашди.