Ҳиндистон хусусий фирмаларга замонавий қирувчи самолётларини йиғишга рухсат берди

Ҳиндистон хусусий фирмаларга замонавий ҳарбий самолётларни лойиҳалаш ва ишлаб чиқишга рухсат беради. Бу ҳақда мамлакат Мудофаа вазирлиги маълум қилди.

«Давлат компаниялари ва хусусий корхоналар икки моторли қирувчи самолётларни қуришда «танлов асосида» «тенг имкониятларга» эга бўлади», — дейилади хабарда.

Қайд этилишича, ҳинд фирмалари «ҳам мустақил, ҳам қўшма корхона ёки консорциум сифатида» ариза беришлари мумкин. Bloombergʼнинг ёзишича, шу кунгача Hindustan Aeronautics Limited давлат ташкилоти маҳаллий аэрокосмик саноатда устунлик қилиб келган, хусусий компаниялар эса асосан самолётлар учун эҳтиёт қисмлар ишлаб чиқариш билан чекланган.

Нашр маълумотларига кўра, ушбу қадам Ҳиндистон бош вазири Нарендра Модининг Хитой ва Покистон билан давом этаётган таранглик шароитида мудофаа соҳасида ўзини ўзи таъминлашга қаратилган кенг қамровли интилишига мос келади. Бундан ташқари, Ҳиндистон ҳарбийлари Украинадаги ҳарбий ҳаракатлар фонида муҳим қуролларни маҳаллий ишлаб чиқаришни ривожлантириш кераклигини қайд этиб келади.

«Ҳиндистонга ўзининг бир моторли Tejas қирувчиларини яратиш ва ишлаб чиқаришни йўлга қўйиш учун ўнлаб йиллар керак бўлди ва энди унинг олдида нисбатан қийин вазифа турибди — асосан Россияда ишлаб чиқарилган самолётлардан иборат эскираётган парк учун икки моторли самолётларни қуриш», — дейилади хабарда.

2025 йил 22 апрел куни Кашмирнинг Ҳиндистон томонидан назорат қилинадиган Паҳалгам шаҳрида туристлар ҳужумга учраган эди. 26 кишининг ўлимига олиб келган воқеада Ҳиндистон Покистонни айблаган. Натижада, икки мамлакат ўртасидаги вазият кескинлашди. Бунга жавобан Ҳиндистон Қуролли кучлари «Синдур» операцияни бошлаб, Покистон ҳудудидаги террорчиларнинг тўққизта объектига зарба берди.

28 апрел куни Ҳиндистон Франция ҳукумати билан 26 та Rafale-M ва Rafale-D қирувчиларини харид қилиш бўйича шартнома имзолади. Битимнинг умумий қиймати 7,4 миллиард долларни ташкил этади.