AP: Россия қамоқхоналарида 200 дан ортиқ украиналик ҳарбий асир ҳалок бўлди

27 май, сешанба куни AP инсон ҳуқуқлари ташкилотлари, БМТ ва Украина ҳукумати вакилларига таяниб, уруш бошланганидан буён икки юздан ортиқ украиналик аскар Россия асирлигида ҳалок бўлгани ҳақида хабар берди. Киев маълумотларига кўра, Россия томонидан қайтарилган 5000 дан ортиқ ҳарбий асирдан камида 206 нафари асирликда ҳалок бўлган. Украина прокуратурасига таяниб журналистларнинг ёзишича, жанг майдонида яна 245 нафар ҳарбий рус аскарлари томонидан ўлдирилган.

Қайд этилишича, жасадлар қайтарилиши ва шахси аниқланар экан, ҳалок бўлган ҳарбий асирлар сони ортиши мумкин. Бироқ суд-тиббиёт экспертлари ўлим сабабини аниқлашда қийинчиликларга дуч келишмоқда. Мисол учун, баъзи ҳолларда марҳумнинг ички органлари йўқ бўлса, бошқаларида кўкаришлар ёки яралар «яширин ёки олиб ташланган». Яна бир тўсиқ — бу жасаднинг парчаланиши.

Россияда асирга олинган украиналик аскарларнинг қарийб 97 фоизи БМТнинг Инсон ҳуқуқлари мониторинги бўйича маҳаллий миссиясига оғир шароитлар ва қийноқлар, жумладан калтаклаш, электр токи билан уриш, жинсий зўравонлик, уйқусизлик ва қатлларни сохталаштириш ҳақида гапирган. Бундай маълумотлар Amnesty International ташкилотининг дунёда инсон ҳуқуқлари аҳволи ҳақидаги ҳисоботида келтирилган.

Шу билан бирга, таҳлилчиларнинг қайд этишича, Россия БМТ кузатувчиларига Украинанинг босиб олинган ҳудудларида украиналик тинч аҳоли ва ҳарбий асирлар сақланаётган жойларга кириш имконини бермаган.