Франция янги атом сувости кемасини тақдим этди

Сувости кемаси 1000 километрга учишга қодир MdCN қанотли ракеталари билан жиҳозланган.

Фото: Naval Group

Франция Ҳарбий-денгиз флоти модернизация дастури доирасида De Grasse номли янги атом сувости кемасини сувга туширди. Бу Barracuda сериясидаги тўртинчи кема ҳисобланади.

Қиймати 10 миллиард еврони ташкил этадиган лойиҳа DGA мудофаа агентлиги томонидан Атом энергетикаси бўйича комиссия иштирокида амалга оширилган. Бош пудратчи Naval Group компанияси бўлиб, у 2500 мутахассис ишини мувофиқлаштиради.

«De Grasse’нинг топширилиши Франциянинг сувости технологиялар соҳасидаги етакчилигини тасдиқлайди», — дейди Naval Group бош директори Пер Эрик Поммелле.

Кема 270 кун давомида узлуксиз патрулни амалга оширишга мўлжалланган ва 1000 километрга учишга қодир MdCN қанотли ракеталари, кемаларга қарши Exocet ва F21 торпедалари билан жиҳозланган. «Шарл де Голл» авиаташувчиси технологияси асосида яратилган реактор эса субмарина «юрагини» ташкил этади.

Barracuda лойиҳаси доирасида 2030 йилга қадар эскирган Rubis кемаларини алмаштириш кўзда тутилган. Янги сувости кемаси Франциянинг ядровий тийиб туриш имкониятларини мустаҳкамлашга хизмат қилади.

Экспертларнинг таъкидлашича, Франция тўлиқ циклли атом сувости кемаларини яратиш технологиясига эга дунёдаги бешта давлатдан бири ҳисобланади. De Grasse’нинг денгиздаги синовлари 2026 йилдан бошланади.

#Франция #атом сувости кемаси