Эрдўған Путин ва Зеленскийни тўғридан тўғри музокараларга чақирмоқда

Володимир Зеленский ва Ражаб Эрдўған 30 май куни кечқурун телефон орқали мулоқот қилди. Туркия президенти матбуот хизмати хабарига кўра, Эрдўған суҳбат чоғида Россия ва Украина президентларининг тезроқ учрашиши тарафдори эканини билдирган.

У Туркия 16 май куни Истанбулда бошланган Россия-Украина музокараларини давом эттириш тарафдори эканини қайд этган. Эрдўғаннинг фикрича, Истанбулда ўтказилиши режалаштирилган музокараларнинг иккинчи раундида эҳтимолий ўт очишни тўхтатишни муҳокама қилиш «тинчликка йўл очади».

Эрдўған икки делегация музокаралари якунлангач, Володимир Зеленский ва Владимир Путин ўртасида учрашув бўлиб ўтиши керак деб ҳисобламоқда. Унинг сўзларига кўра, буни «пайсалга солмасдан» амалга ошириш керак.

Зеленский Эрдўған билан суҳбатни «мазмунли» деб атади. Улар Истанбулдаги музокараларнинг биринчи раундини муҳокама қилишган. «Асирлар алмашинуви – бу унинг [музокараларнинг] муҳим ютуғи, лекин афсуски, ягона ютуғи. Тинчлик сари ҳаракатни давом эттириш учун ўт очишни тўхтатиш керак», – деди Украина президенти.

У, шунингдек, Москва вакиллари билан Истанбулда «навбатдаги эҳтимолий учрашув» ва «Украина қандай шароитларда унда иштирок этишга тайёрлиги» муҳокама қилинганини айтди.

Россия Украинага музокараларнинг янги раундини 2 июн куни Истанбулда ўтказишни таклиф қилган. 30 май куни Украина ТИВ раҳбари Андрей Сибига Киев Истанбулда музокараларнинг янги раундини ўтказишга тайёрлиги, бироқ Москвадан ҳали ҳам ўт очишни тўхтатиш шартлари билан меморандумнинг ваъда қилинган матнини кутаётганини айтди. Россия расмийлари ҳужжатни фақат Истанбулдаги учрашувда тақдим этишларини айтишмоқда.

Шу билан бирга, Сибига учрашув 2 июн куни бўлиб ўтишига аниқлик киритмаган. Зеленскийнинг Эрдўған билан суҳбати якунлари бўйича баёнотидан Украина вакиллари 2 июн куни бўлиб ўтадиган учрашувга бориши ёки бормаслиги ҳам тушунарсиз. Россия президенти матбуот котиби Дмитрий Песков Россия музокарачилар делегацияси «Истанбулга йўл олаётгани ва душанба куни эрталабдан музокараларни давом эттиришга, ушбу музокараларнинг иккинчи раундига тайёр бўлиши»ни айтган.

The Washington Post нашрининг таъкидлашича, Украина Вашингтон томонидан Киевни Истанбулдаги музокараларда иштирок этишга мажбур қиладиган босимга дуч келиши мумкин бўлган «ноқулай дипломатик вазият»га тушиб қолди – ҳатто Москва ўз меморандумини олдиндан тақдим этмаса ҳам.