«Илондан жуда ҳафсалам пир бўлди» — Трамп солиқ имтиёзларига оид қонун лойиҳасини танқид қилган Маск ҳақида

АҚШ президенти Доналд Трамп миллиардер Илон Маск билан «жуда яхши» муносабатда бўлгани, бироқ энди бизнесмендан «ҳафсаласи пир бўлгани»ни маълум қилди. Бу баёнотини Трамп журналистларнинг Маск билдираётган танқидларга изоҳ бериш илтимосига жавобан айтиб ўтди.

Илон Маск республикачиларнинг солиқ имтиёзларини узайтириш ва бюджет бўйича қонун лойиҳасини танқид қилган эди.

«Мен унинг нима учун норози эканини тушунаман… Қаранг, биз Илон билан жуда яхши муносабатда эдик. Бу яна [шундай] бўладими, билмайман. У мен ҳақимда жуда яхши гапирган, ёмон сўз айтмаган, лекин ишончим комилки, кейинги сафар бу содир бўлиши мумкин. Аммо Илондан жуда ҳафсалам пир бўлди. Мен унга кўп ёрдам берганман», — дейди Трамп Овал кабинетда Германия канцлери Фридрих Мерц билан учрашувда.

Давлат харажатлари бўйича Маскнинг фикрларига жиддий муносабатда бўлиш керакми, деган саволга Трамп «йўқ», деб жавоб қайтарди.

«У [Маск] кўп ишлади ва вазифасини яхши бажарди. Тўғрисини айтганда, у бу ерни соғингандек. Менимча, у кўчага чиқдию, тўсатдан бу ажойиб Овал кабинетда эмаслигини англади. Мен у қонун лойиҳасини эмас, балки мени танқид қилишини маъқул кўрардим, чунки ушбу қонун лойиҳаси ажойиб», — дейди АҚШ президенти.

Май охирларига қадар Илон Маск АҚШ президенти маъмурияти ҳузуридаги Ҳукумат самарадорлиги департаментини (DOGE) бошқарди. Департамент ҳукумат харажатларини қисқартириш учун тузилган.

Трамп маъмуриятидан кетгач, бизнесмен янги солиқ имтиёзлари тўғрисидаги қонун лойиҳасини кескин танқид қилди. Маск ушбу ташаббусни — «жирканч бузуқлик» деб атаб, таклиф қилинган тузатишлар бюджет маблағларининг талон-торож қилинишига олиб келишини таъкидлади.