Испания Исроил билан ракеталар етказиб бериш бўйича шартномани тўхтатди

Испания мудофаа вазирлиги армия эҳтиёжлари учун аввалроқ Spike LR2 танкка қарши ракета тизимини ишлаб чиқаришга келишиб олган Исроил компанияси билан шартномани тўхтатиб қўйишни буюрди.

Испания ОАВнинг Мудофаа вазирлигидаги манбаларга таяниб хабар беришича, департамент 2023 йил 3 октябрда эълон қилинган ва Исроилнинг Rafael Advanced Defense Systems компанияси Испания бўлими Pap-Tecnos билан тузилган тахминан 285 миллион евролик шартномани музлатишга қарор қилган.

Ўтган ҳафта Испания Мудофаа бўйича давлат котиби Ампаро Валкарсе ҳукумат Исроилга «ҳар қандай қарамликдан қочиш учун чиқиш режаларини ишлаб чиқаётганини» айтди.

Испания расмийлари «Исроил билан қурол сотиб олиш ёки сотиш бўйича ҳеч қандай лойиҳаларимиз йўқ» деб даъво қилса-да, фуқаролик жамияти ва мухолифатдаги сўл партияларнинг босими ортиб бораётган бир пайтда, улар «баъзи дастурлар Исроил компанияси томонидан тақдим этилган технологияга боғлиқлигини тан олди ва Мудофаа вазирлиги бу қарамликни тугатиш устида ишламоқда».

Айни пайтда испан оммавий ахборот воситалари қуруқликдаги қўшинлар томонидан қўлланаётган ракета тизимлари эскирганлигини ва иттифоқчи давлатлар армиялари қўллаётган ракета тизимларига ўхшаш замонавийроқлари билан алмаштирилиши кераклигини таъкидламоқда.

Шу билан бирга, Мудофаа вазирлиги томонидан олиб борилган тадқиқотлар шуни кўрсатдики, фақат Исроил компанияси зарур техник малакага эга.

Тендер шартларига кўра, беш йил давомида қуруқликдаги кучлар ва денгиз пиёдалари бўлинмаларини Spike LR2 ракеталари билан жиҳозлаш учун тахминан 285 миллион евро ажратилган.

Бундан ташқари, яқин кунларда Испания парламенти Исроилга қурол-яроғ етказиб беришга эмбарго жорий этиш тўғрисидаги қонун лойиҳасини овозга қўйиши кутилмоқда.