Сан-Францискода депортацияга қарши 60 нафар намойишчи қўлга олинди

Сан-Франсискода АҚШ Иммиграция ва божхона назорати (ICE) рейдлари натижасида юзага келган тартибсизликлар чоғида 60 га яқин киши, жумладан, вояга етмаганлар қўлга олинди. Бу ҳақда 9 июн, душанба куни шаҳар полициясининг (SFPD) Х ижтимоий тармоғидаги аккаунтида маълум қилинди.

Ҳисоботда айтилишича, 9 июн оқшомида тинч намойиш зўравонликка айланиб, унинг иштирокчилари «ҳужум қилишдан тортиб оғир вандализм ва мулкий зарарга қадар» жиноятлар қила бошлаган. Кейин йиғилиш ноқонуний деб топилди. «Кўпчилик ҳудудни тарк этган бўлса-да, бир нечаси қолди ва ноқонуний хатти-ҳаракатлар қилишда давом этди», дея билдирди полиция. Уларнинг сўзларига кўра, икки офицер ҳаёти учун хавфли бўлмаган тан жароҳатлари олган, улардан бири касалхонага ётқизилган.

Намойишчиларнинг кичик бир гуруҳи тартибсизликларни давом эттирди ва полициянинг тарқалиш буйруғига бўйсунишдан бош тортди. Кейин 60 га яқин одам қўлга олинган. «Одамлар ҳар доим ўзларининг Биринчи тузатишга киритилган ҳуқуқларидан фойдаланиш ҳуқуқига эга (у сўз, матбуот ва йиғилишлар эркинлиги ҳуқуқини эълон қилади), лекин зўравонлик, айниқса Сан-Франциско полициячиларига нисбатан ҳеч қачон қабул қилинмайди», — дея хулоса қилди полиция.

АҚШ федерал ҳукумати антимиграцион рейдларга қарши норозилик намойишлари фонида Лос-Анжелесда жойлаштирилган миллий гвардиячилар сонини икки баробарга, яъни 4000 кишига етказишга қарор қилди. Бу ҳақда Калифорния губернатори Гэвин Нюсом маълум қилди.

Миллий гвардиянинг янги бўлинмаларидан ташқари Калифорниядаги "Кэмп-Пендлтон" базасидан 700 нафар денгиз пиёда аскарлари ҳам Лос-Анжелесга юборилади. АҚШ президенти маъмурияти бу қарорни «федерал ходимлар ва биноларга нисбатан таҳдидларнинг кучайиши» билан изоҳлади, деб ёзади AFP.