«Сити» ва «Реал»да қайта қуриш бошланди. Ёзнинг илк ҳафталаридаги трансферлар

Клублар ўртасидаги жаҳон чемпионати туфайли ФИФА 1-10 июн кунлари махсус трансфер дарчаси очиб берди. Шу туфайли Европанинг ушбу турнирда иштирок этувчи қатор клублари ўз таркибларини ёзнинг бошидаёқ тўлдириб олишди, мухлислар ушбу жамоалар сафидаги янги футболчиларни турнирда кўриши мумкин. Турнирда иштирок этмайдиган клублар ҳам фаоллик билан келишувлар тузмоқда (бу футболчиларда мавсумлар оралиғидаги ўртоқлик ўйинларида иштирок этиб, янги жамоага мослашиш имкони бўлади). Қуйида ёзнинг қизғин кечган илк ҳафталарида амалга оширилган трансферлар ҳақида.

Трент Александер-Арнолд: «Ливерпул» → «Реал» Мадрид (10 млн евро)

Англиялик ҳимоячи болалигидан ўйнаган «Ливерпул»дан «Реал»га эркин агент мақомида ўтди. Бу ўтиш кутилган трансфер эди, футболчи Испания клубига келиб қўшилиши март ойидаёқ маълум бўлиб улгурганди. Аммо мадридликлар Трентнинг мерсисайдликлар клуби билан шартнома муддати тугайдиган 1 июл санасини кутиб ўтирмади. «Реал» футболчини клублар ўртасидаги жаҳон чемпионатида ўйнатиш учун «Ливерпул» ҳисобига 10 млн евро ўтказиб берди ва ҳимоячи билан олти йиллик шартнома тузилди. 12 июн куни 26 ёшли футболчи расман «Реал» футболчиси сифатида таништирилди, у тақдимот маросимида испан тилини аллақачон тўлиқ ўрганиб бўлганини намойиш этиб, кўпчиликни ҳайрон қолдирди.

Дин Ҳаусен: «Борнмут» → «Реал» (59,5 млн евро)

20 ёшли марказий ҳимоячининг ўтган мавсумдаги ўйинларидан кейин топ-клублар унинг учун навбатга турди. Аммо, кутилганидек бу пойгада Мадриднинг «Реал» клуби ғолиб чиқди. Нидерландиялик футболчи Донни Ҳасуеннинг ўғли бўлган Дин болалигидан Испаниянинг ушбу гранди сафида ўйнашни орзу қилганди. Шу туфайли томонлар келишувга эришиши осон кечди. Испания миллий жамоасига номзод Ҳаусен «Реал» билан беш йиллик шартнома тузди. «Борнмут» эса футболчи трансфери учун қарийб 60 млн евро ишлаб олди. Энди Ҳаусендан «Реал» учун янги Серхио Рамос бўлишини кутишади. Футболчи айнан уни ўзининг болаликдаги кумири деб атаган.

Райан Шерки: «Лион» → «Манчестер Сити» (36,5 млн евро)

«Манчестер Сити» Европанинг энг истеъдодли ҳужумкор яримҳимоячиларидан бирини ўзиники қилди. Райан Шерки учун клуб 36,5 млн евро тўлади. Бу яқин келажакда суперюлдузга айланиш салоҳияти бор бўлган футболчи учун катта маблағ эмас. 21 ёшли француз якунланган мавсумда «Лион» учун барча турнирлар доирасида 44 ўйин ўтказиб, 12 гол урган ва 20 голга узатма берган. Шерки французлар клуби асосий таркибида 16 ёшда дебют қилган, энди у ўзини АПЛ майдонларида синаб кўради.

Райан Аит-Нури: «Вулверҳэмптон» → «Манчестер Сити» (36,8 млн евро)

«Вулверҳэмптон»ни 2025 йил ёзида жиддий қайта қуриш кутмоқда. Клуб нафақат асосий тўпурари Кунядан, балки ҳужумларга фаол қўшиладиган ҳимоячиси Райан Аит-Нуридан ҳам айрилди. Шу билан бирга, «бўрилар» икки футболчи учун жами 100 млн евродан кўпроқ маблағга эга бўлди. Шундан 36,8 млн еврони «Манчестер Сити» тўлади. Аит-Нури Пеп Гвардиола жамоаси билан беш йиллик шартнома имзолаган. 24 ёшли жазоирликнинг асосий позицияси – чап қанот ҳимояси. Аммо Гвардиола кейинги мавсумда ундан бутунлай бошқа ролларда фойдаланиши ҳам мумкин.

Тейани Рейндерс: «Милан» → «Манчестер Сити» (55 млн евро)

«Манчестер Сити» совринсиз ўтган мавсумдан кейин клублар ўртасидаги жаҳон чемпионатида соврин ютишга қарор қилди ва яна катта пул билан бозорга кирди. Клуб бир кун ичида уч трансферини эълон қилди. Гвардиола ихтиёрига Италия чемпионатининг энг яхши яримҳимоячиларидан бири Тейани Рейндерс ҳам келиб қўшилди. 26 ёшли нидерландиялик майдондаги вазифаларига кўра Илкай Гундўғанни ёдга солиб юборади ва майдон марказида исталган ролни бажариши мумкин. «Манчестер Сити» «Милан»га ушбу футболчи учун 55 млн евро тўлади, Рейндерс клуб билан беш йиллик шартномага эга бўлди. «Мен «Манчестер Сити»га ўтганимдан ҳайратдаман. Бу жаҳоннинг энг яхши мураббий, жаҳон даражасидаги юлдузлар ва ажойиб инфратузилмага эга энг катта клубларидан биридир. Премер-лигада иштирок этиш — орзу эди ва бу рўёбга чиқди», — деди Тейани тақдимот маросимида.

Жереми Фримпонг: «Байер» → «Ливерпул» (40 млн евро)

Бу «Ливерпул»нинг ёзги трансферлар ойнасидаги илк футболчиси. Клуб Жереми Фримпонгни «Реал»га кетган Трент Александер-Арнолдга ворис сифатида кўрмоқда. У «Ливерпул» сафида Виржийл ван Дейк, Коди Гакпо, Райан Гравенберҳ ва бош мураббий Арне Слотдан кейинги бешинчи нидерланд бўлади. Фримпонг – услуб жиҳатдан Трентга бутунлай тескари. Александр-Арнольд марказга кўчишни ва узун узатмалар беришни хуш кўрган бўлса, Жереми ўзи қанот бўйлаб олдинга боришни маъқул кўради. Слот Фримпонгни «Ливерпул» тизимига қандай қўшишини кузатиш қизиқ бўлиши тайин.

Жонатан Та: «Байер» → «Бавария» (800 минг евро)

Жонатан Та шартномаси муддати тугагани муносабати билан «Байер»ни тарк этди. Германиялик футболчида фаолиятини давом эттириш учун бир неча вариант бор эди («Реал», «Барселона», «Бавария») ва якунда футболчи Германияда қолишга қарор қилди. «Бавария» ҳам ушбу ҳимоячини клублар ўртасидаги жаҳон чемпионатига олиб бориш учун «Байер»га 800 минг евро тўлади. Мюнхенликларнинг турнирдаги натижасига қараб бу сумма миқдори 1 млн еврогача чиқиши мумкин. 29 ёшли футболчи «Бавария» билан 2029 йил июнига қадар амал қилувчи шартнома имзолаган.

Матеус Куня: «Вулверҳэмптон» → «Манчестер Юнайтед» (74,2 млн евро)

«Манчестер Юнайтед» еврокубокларга йўлланма ололмаган, клублар ўртасидаги ЖЧда ҳам қатнашмайди, аммо ёзнинг топ-трансферларидан бирини амалга оширди. Бренд кучи ҳамон иш бермоқда. «МЮ» бразилиялик форвард Матеус Куняни «Вулверҳэмптон»дан 74,2 млн евро эвазига харид қилди. Манкунианликлар трансфер суммасини бир неча йил мобайнида бўлиб-бўлиб тўлайди. 26 ёшли футболчининг ўзи янги клуби билан беш йиллик шартнома тузди. Энди Кунядан «МЮ»ни еврокубокларга қайтаришда ёрдам бериш талаб этилади.

Лиам Делап: «Ипсвич» → «Челси» (35,5 млн евро)

«Ипсвич» АПЛни тарк этди. Аммо форвард Лиам Делап элита дивизионда қолди. 22 ёшли форвард «Челси» билан олти йиллик шартнома тузди. Лондонликлар «Манчестер Сити» тарбияланувчиси бўлган ушбу футболчи учун 35,5 млн евро тўлаб беришди. 2023 йилда «Челси» манчестерликлар тизимидан чиққан бошқа бир футболчи – Коул Палмерни трансфер қилиши муваффақиятли бўлганди. Энди Лондондагилар Делап клуб учун зарур бўлган сермаҳсул ҳужумчи бўлишидан умид қилмоқда. У «Сити»нинг бошқа тарбияланувчиси билан энди «Челси»да ёрқин дуэт ҳосил қилиши кутилмоқда.

Мамаду Сарр: «Страсбург» → «Челси» (14 млн евро)

Яна бир ёш истеъдод «Челси»да. Лондонликлар 19 ёшли ҳимоячи Мамаду Сарр жамоа мудофаасини кучайтиришига умид боғлаган. Футболчи бунгача Франциянинг «Страсбург» клуби шарафини ҳимоя қилган (бу клуб ва «Челси» хўжайини бир одам). Сарр энди янги даражада ўзини синаб кўради ва кейинги мавсум Чемпионлар лигасида майдонга тушади. Француз футболчиси Лондон клуби билан саккиз йиллик шартномага имзо чеккан.

Жоб Беллингҳэм: «Сандерленд» → «Боруссия» Дортмунд (30,5 млн евро)

Беллингҳэм, Англиядан «Боруссия»га трансфер… Таниш ҳолат. Дортмунддагилар мазкур трюкни иккинчи бор бажаришга қарор қилишди. Бу сафар немислар жамоаси Жуднинг укаси Жобни сафга қўшиб олди. 19 ёшли яримҳимоячи «Сандерленд»га АПЛга қайтишда ёрдам берди. Энди эса 30,5 млн евро эвазига «Боруссия» Дортмундга йўл олди. Бир неча йилдан кейин у Жоб «Реал»да пайдо бўлишини кутиш ҳам мумкин.

Луис Энрике: «Марсел» → «Интер» (23 млн евро)

Луис Энрике – «Интер»да. Йўқ, бу «ПСЖ» бош мураббийи эмас. Милан жамоаси «Марсел» етакчиларидан бирини ўз сафига қўшиб олди. 23 ёшли вингер ўтган мавсумда Франция чемпионатидаги 35 ўйинда тўққиз гол урди ва 10 ассист расмийлаштирди. Одатда Энрике ҳужум қанотида ўйнайди: бу «Интер»нинг собиқ устози Симоне Индзагининг схемасида бўлмаган позиция. Аммо, катта эҳтимол билан, миланликлар бошқарувига келган Кристиан Кивунинг жамоа учун бошқа режалари ва тактикалари мавжуд. Клублар ўртасидаги жаҳон чемпионатидаги ўйинларда 23 ёшли бразилиялик «Интер»нинг етакчиларидан бирига айланади, йўқми, шу саволга жавоб топилади.

Кивин Келлеҳер: «Ливерпул» → «Брентфорд» (14,8 млн евро)

Кивин Келлеҳер – ажойиб кипер. Аммо Алисон саломатлигида у «Ливерпул»нинг асосий посбони бўлиши нореал ҳолат. Шу туфайли 26 ёшли ирландиялик ўзи учун келган таклифни қабул қилди. Келлеҳер энди АПЛнинг ўртамиёна жамоаси – «Брентфорд» дарвозасини қўриқлайди. «Ливерпул» футболчи учун 14,8 млн евро олди, Кивин – ажойиб жамоанинг асосий посбони бўлиш имкониятга эга бўлди.

Петар Сучич: «Динамо» Загреб → «Интер» (14 млн евро)

«Интер» клублар ўртасидаги жаҳон чемпионатида натижага эришишга бел боғлаган. Шу туфайли Загребнинг «Динамо» клубидан ҳам яримҳимоячи Петар Сучич сафга қўшиб олинди. Миланликлар 21 ёшли футболчи учун 14 млн евро тўлашга рози бўлди. Хорватлар клуби Сучичнинг қайта сотувидан ҳам улушга эга бўлади. Петар «Интер» билан беш йил муддат амал қиладиган шартнома имзолади. Энди у асосий таркиб учун Ҳоқон Чалхонўғли, Генрих Мхитарян, Николо Барелла ва Давиде Фраттези билан рақобатлашади.

Де Брюйне: «Манчестер Сити» → «Наполи» (эркин агент)

Кевин де Брюйненинг «Манчестер Сити»да ўтган 10 мавсумлик саёҳати якунланди. Сўнгги йилларда жароҳатлардан азият чеккан футболчи жамоанинг асосий таркибидан тушиб қолди ва шартнома муддати якунлангач, клуб уни қўйиб юборди. Энди белгиялик яримҳимоячи интенсивлик бироз пастроқ бўлган Италия чемпионатида кўпроқ ўйин амалиётига эга бўлиши тайин. Ўтган ёзда Манчестернинг бошқа бир жамоасидан келган Скотт Мактоминай «Наполи»нинг навбатдаги чемпионлигига катта ҳисса қўшган ва ўтган мавсумнинг энг яхши футболчиларидан бири бўлганди. КДБ унинг муваффақиятини такрорлашга ҳаракат қилади.

Киран Тирни: «Арсенал» → «Селтик» (эркин агент)

Тирнининг карьерасига жароҳатлар халақит берди. «Арсенал» Тирнини 2019 йилда катта умидлар билан сотиб олганди, аммо шотландиялик чап қанот мудофаасидаги муаммони ҳал қила олмади. Саломатлигидаги муаммолар унинг асосий таркибда ўрнашиб олишига имкон бермади. «Реал Соседад»га бир мавсум ижарага берилгани ҳам, Микел Артета 2024/2025 йиллар мавсумида берган навбатдаги имкон ҳам наф бермади. «Арсенал» Киран билан шартномани узайтирмади ва 28 ёшли футболчи «Селтик»ка қайтди.

Жоржинио: «Арсенал» → «Фламенго» (эркин агент)

Жоржинио ҳам Микел Артетага керак бўлмай қолди ва ватанига йўл олди. 33 ёшли яримҳимоячи «Фламенго» футболчисига айланди — бу клуб Жанубий Американинг энг катта клубларидан бири ҳисобланади. Жоржинио янги жамоаси билан 2028 йил ёзига қадар амал қиладиган шартнома имзолади ва 21-рақамни танлади. Энди у клублар ўртасидаги жаҳон чемпионатида иштирок этади.

Эрик Дайер: «Бавария» → «Монако» (эркин агент)

Англиялик ҳимоячи керакли вақтда «Бавария»га ёрдам берди ва ўз фаолиятида илк бор соврин ютди. Аммо клуб Дайерга янги шартнома таклиф қилмади. Лекин 31 ёшли футболчига «Монако»да жой топилди. Дайер бунгача Португалия, Англия ва Германия чемпионатларида ўйнаган. Энди унинг фаолиятида янги саҳифа очилади.

Анхел Ди Мария: «Бенфика» → «Росарио Сентрал» (эркин агент)

Ди Мария ҳам жонажон клубига қайтди. Анхел «Бенфика»ни тарк этиб, «Росарио Сентрал» футболчисига айланди. «Бизнинг умумий тарихимиз учун ҳали кўп саҳифалар ёзиш керак», — дейилади клубнинг трансфер ҳақидаги анонсида. Ди Мария 2006-2007 йилларда ҳам «Росарио Сентрал» сафида ўйнаган. Эътиборли томони, 37 ёшли аргентиналик ватанга қайтиш ҳақида ўтган мавсум олдидан ҳам ўйлаганди. Аммо ўшанда хавфсизлик нуқтайи назардан бу режадан воз кечилганди (футболчи ва унинг оиласига турли таҳдидлар келганди).