Чехия ҳукумати навбатдаги ишончсизлик вотумини енгиб ўтди

Чехия мухолифатининг Петр Фиала ҳукуматига ишончсизлик вотумини билдиришга тўртинчи уриниши яна муваффақиятсизликка учради. Бу сафар у Адлия вазирлигининг собиқ раҳбари Павел Блажек атрофидаги биткоин можароси билан боғлиқ эди.

Фото: TASS/AP/Petr David Josek

Чехия бош вазири Петр Фиала ҳукумати унга ишончсизлик билдириш бўйича тўртинчи уринишдан омон қолди, деб ёзади 18 июн, чоршанба куни маҳаллий ČTK газетаси. Бу сафар Чехия мухолифати ташаббуси билан берилган ишончсизлик вотуми Фиаланинг ҳамкори ва собиқ адлия вазири Павел Блажек атрофидаги криптовалюта можароси билан боғлиқ бўлди. Прагада мухолиф партиялардан 94 депутат ҳукумат истеъфоси учун овоз берди. Бироқ 200 ўринли парламент қуйи палатаси учун зарур бўлган 101 овознинг кўпчилик овозига яна эришилмади. Амалдаги коалициядан 98 депутат ҳукуматни ёқлаб чиқди.

Қайд этилишича, собиқ бош вазир Андрей Бабишнинг ANO партияси, шунингдек, ўтган йилдан бери мухолифатда бўлган ўта ўнг SPD ва «Қароқчилар партияси» вакиллари ҳукумат истеъфосини ёқлаб овоз берган. Ишончсизлик тўғрисидаги таклиф Чехия парламентида тахминан 34 соат давом этган мунозараларга сабаб бўлди. ANO Европа Иттифоқи даражасида Австриянинг FPÖ ва Венгриянинг Виктор Орбаннинг ФИДЕС партияси билан ҳамкорлик қилади, дея аниқлик киритади dpa агентлиги.

Ишончсизлик вотумига Чехия Адлия вазирлиги деярли бир миллиард чех кронасига (тахминан 40 миллион евро) келиб чиқиши шубҳали биткоин криптовалютасини сотганидан сўнг бошланган «биткоин можароси» сабаб бўлди, деб ёзди ČTK ўтган ҳафта. Вазир Павел Блажек истеъфога чиқди. Мухолифат, шунингдек, молия вазири Збинек Станюранинг истеъфосини талаб қилмоқда. Мақолада таъкидланганидек, 18 июн кунги йиғилиш ANO партияси ташаббуси билан чақирилган.

Чех мухолифатига кўра, криптовалюта суммасини Адлия вазирлигига муқаддам ўзлаштириш, гиёҳванд моддалар савдоси ва ноқонуний қурол сақлашда айбланган тадбиркор Томаш Йириковский ўтказган. Янги адлия вазири Ева Декруа август ойининг охиригача, яъни октябр ойида Чехияда бўлиб ўтадиган парламент сайловлари олдидан аудит ўтказиб, текширув натижаларини эълон қилишни режалаштирмоқда, деб ёзади ČTK.

#Чехия #ишончсизлик вотуми