АҚШ вице-президенти Вэнс: Биз Эрон билан уришаётганимиз йўқ

АҚШ вице-президенти Жей Ди Вэнс Американинг Эронга зарбаларини изоҳлар экан, Вашингтон Теҳрон билан эмас, балки унинг ядро дастури билан уришаётганини айтди. Бу ҳақда у 22 июн, якшанба куни NBC телеканалига берган интервюсида айтиб ўтди.

«Биз Эрон билан уришаётганимиз йўқ. Эрон ядро дастури билан уруш ҳолатидамиз», — дейди Вэнс. Унга кўра, АҚШ зарбалари «Эрон ядро дастурини йўқ қилди». «Ўйлайманки, биз уни сезиларли даражада ортга қайтардик», дея қўшимча қилди вице-президент.

Шу билан бирга, NBC таъкидлаганидек, Вэнс Эроннинг ядровий иншоотлари тўлиқ вайрон бўлганини 100 фоиз ишонч билан тасдиқлашдан бош тортди, бунинг ўрнига, АҚШ Эроннинг ядро қуролини яратиш қобилиятини «сезиларли даражада кечиктирганини» таъкидлади.

«Мен Эронда кўрганларимиз ҳақидаги махфий разведка маълумотларини келтирмоқчи эмасман. Лекин биз кўп нарсани кўрдик ва уларнинг ядро қуролини яратишини сезиларли даражада кечиктирганимизга тўлиқ ишонаман, бу ҳужумдан мақсад шу эди», — дея бошловчининг АҚШ маъмурияти Эрон ядро иншоотлари тўлиқ вайрон қилинганига 100 фоиз ишончи комилми, деган саволига Вэнс шундай жавоб берди.

ABC телеканалига берган алоҳида интервюсида Вэнс Эроннинг Фордодаги энг мустаҳкам ядровий иншооти вайрон бўлганми ёки шунчаки шикастланганми, аниқ айтмади. «У жиддий шикастланганми ёки вайрон бўлганми, фарқ нима эканлигини тўлиқ билмайман», деди Вэнс ва АҚШ Эроннинг ядровий дастурини «сезиларли даражада ортга сурганини» яна бир бор таъкидлади.

Айни пайтда АҚШ президенти Доналд Трамп зарбалардан сўнг берган баёнотида «Эроннинг уранни бойитиш бўйича асосий иншоотлари тўлиқ ва бутунлай йўқ қилинган», деб айтди. Мудофаа вазири Пит Ҳегсет 22 июн куни бўлиб ўтган матбуот анжуманида «Эроннинг ядровий амбициялари» йўқ қилинганини таъкидлади. Худди шу брифингда штаб бошлиқлари бирлашган қўмитаси раиси Дэн Кейн жанговар ҳаракатлар натижасида етказилган якуний зарарни баҳолаш «бироз вақт олишини» билдирди.

Эрон расмийлари АҚШ зарбаларидан сўнг бир муддат аввал АҚШ ҳужум қилган учта ядровий объектни – Фордоу, Натанз ва Исфахонни эвакуация қилганини таъкидлади. «Бойитилган уран захиралари ядро марказларидан олиб чиқиб кетилди ва у ерда, агар нишонга олинган бўлса, радиация келтириб чиқариши ва ватандошларимизга зарар етказиши мумкин бўлган материаллар қолмаган», — деди Эрон давлат телерадиокомпанияси раҳбари ўринбосари Ҳасан Абедини.

Эрон парламенти раиси маслаҳатчиси Меҳди Муҳаммадийнинг айтишича, Эрон Фордога ҳужум қилинишини кутган, шунинг учун «объект анча вақт олдин эвакуация қилинган, етказилган зарар жуда катта эмас».

Пентагон маълумотларига кўра, GBU-57 бункерга қарши бомбалари Фордо объектига ташланган. Зарбалар оқибатларини Planet Labs компаниясининг сунъий йўлдош тасвирларида кўриш мумкин: туннелларга кириш қисмлари вайрон қилинган ва объект устидаги тупроқ ранги ўзгарган. Мутахассислар объект яна қандай зарар кўрганини ҳозирча айта олмаяпти, дея хабар беради тасвирларни таҳлил қилган AP агентлиги.