Бортида 3 мингта автомобил бўлган кема Тинч океанида чўкиб кетди

Июн бошларида 3 мингга яқин автомобилни олиб кетаётган Morning Midas юк ташувчи кемасида ёнғин чиққани тўғрисида хабар берилганди. The Wall Street Journal’нинг ёзишича, кема бугун, 24 июн куни чўкиб кетган.

Қайд этилишича, кема Аляскадан 480 километр узоқликдан сузиб ўтаётганида, унинг бортида ёнғин чиққан. «Экипаж алангани ўчириш чораларини кўрди, аммо вазиятни назорат остига олиб бўлмайди», — дейилади Zodiac Maritime бошқарув компанияси баёнотида.

АҚШ соҳилни қўриқлаш хизмати 22 нафар денгизчини яқин атрофдан сузиб ўтаётган савдо кемасига эвакуация қилган.

Компаниядагиларга кўра, ўтган ҳафталар давомида ҳам оловни ўчиришнинг имкони бўлмаган, чунки унинг бортида 800 га яқин электромобиль, уларда эса литий-ионли аккумуляторлар бўлган. Бу турдаги аккумуляторлар ёнганда жуда кўп иссиқлик ажратади ва ҳатто ўчирилганидан кейин ҳам қайта ёниши мумкин.

Ёнғин ва ёмон об-ҳаво шароитлари сабаб кема бугун чўкиб кетган. Маълумотларга кўра, кема бортида Мексика бозори учун мўлжалланган Хитой автомобиллари бўлган.