Яқин юз йилда қушларнинг 500 дан ортиқ тури йўқолиб кетиши мумкин

Олимлар кейинги юз йил ичида қушларнинг 500 дан ортиқ тури йўқолиб кетиши мумкинлигини аниқлади. Улар қушлар популяциясини тиклаш бўйича тезкор дастурларни амалга оширишга чақирди, деб ёзади The Guardian.

Қайд этилишича, қушларнинг ҳатто бир неча тури йўқолиб кетиши ҳам бутун дунё бўйлаб экотизимнинг бузилишига олиб келади. Тадқиқотнинг етакчи муаллифларидан бири бўлган Рединг Керри Стюард университети вакилининг сўзларига кўра, Ер «қушларнинг йўқолиб кетиш инқирозига» дуч келган. Прогнозларда келтирилишича, 2125 йилга бориб сайёрада охирги 500 йилдагидан кўпроқ қуш турлари йўқолиб кетади.

Таъкидланишича, қушлар популяциясининг камайишига қишлоқ хўжалигининг кенгайиши ва ривожланиши сабаб бўлмоқда. Шунингдек, иқлим ўзгариши, ўрмонларни кесиш, табиий муҳитнинг ёмонлашуви ҳам уларнинг йўқолиб кетишига таъсир кўрсатмоқда. Шу билан бирга, қушларга нисбатан салбий таъсирлар тўхтатилган тақдирда ҳам уларнинг 250 га яқин тури барибир йўқ бўлиб кетади.

Олимлар ушбу нодир қуш турларини сақлаб қолиш учун уларни тутқинликда кўпайтириш ва яшаш муҳитини тиклаш бўйича дастурлар яратишга чақирмоқда. «Қўриқланадиган ҳудудлар муҳим рол ўйнаши мумкин, бироқ қишлоқ хўжалиги, ўрмончилик, балиқ овлаш, овчилик ва бошқа манбалардан келадиган таҳдидларни камайтириш ҳал қилувчи аҳамиятга эга. Шу билан бирга, айрим турлар махсус тиклаш чора-тадбирларини талаб қилади», — деди тадқиқот муаллифларидан бири Стюарт Бутчарт.