Андижон шаҳрида эркак жанжал сабаб хотинини ўлдирди

Гумонланувчи Олтинкўл тумани ҳудудида тунги хизматга жалб қилинган ходимлар томонидан аниқланиб, қўлга олинган.

Жорий йилнинг 4 июл куни соат 9:30 ларда Андижон шаҳрида яшовчи фуқаро 1982 йилда туғилган турмуш ўртоғи билан Андижон шаҳар Ўрикзор маҳалласида келиб чиққан жанжал оқибатида аёлнинг бўйин қисмига хўжалик пичоғи билан уриб жароҳат етказиб, воқеа жойидан яширинган.

Олган тан жароҳати оқибатида жабрланувчи воқеа жойида вафот этган.

Мазкур ҳолат юзасидан Андижон шаҳар прокуратураси томонидан Жиноят кодексининг 97-моддаси 1-қисми билан жиноят иши қўзғатилиб, гумонланувчини ушлаш бўйича тезкор-қидирув чоралари кўрилган.

Олиб борилган тадбирлар жараёнида гумонланувчи Андижон вилояти Олтинкўл тумани, Кўмакай маҳалласи ҳудудида тунги хизматга жалб қилинган ходимлар томонидан аниқланиб, қўлга олинган.

Ҳозирда гумонланувчи процессуал тартибда қамоққа олинган бўлиб, тергов-суриштирув ҳаракатлари давом этмоқда.

#жанжал #Андижон шаҳри #Олтинкўл тумани