Американинг Lucid Air электромобили Гиннес рекордини ўрнатди

Электромобил бир қувватда 1205 км масофани босиб ўтди.

Фото: Lucid Air

Американинг Lucid Air седани бир аккумулятор қуввати билан энг узоқ масофани босиб ўтиш имкониятига эга электромобил сифатида Гиннеснинг рекордлар китобига кирди.

Электромобил Швейцариянинг Санкт-Мориц шаҳридан Германиянинг Мюнхен шаҳрига йўл олди ва тўхтамасдан, қувватланмасдан 1205 км масофани босиб ўтди. Компания матбуот хизмати аввалги рекорд 160 км га оширилганини маълум қилди.

Рекорд Lucid Air электромобилининг Grand Touring версиясида ўрнатилди. У 831 от кучига эга двигател билан жиҳозланган, бу унга 270 км/соат тезликка эришиш имконини беради.

Ўта тез қувватлантириш функцияси батареяни 400 км ҳаракатланиш захирасига 16 дақиқада тўлдириш имконини беради. Аккумулятор қуввати 112 кВт·с. WLTP циклига кўра, моделнинг ҳаракатланиш масофаси 960 км га етади.

2024 йилда Lucid Air электромобилида бир батарея қуввати билан саёҳат қилинган мамлакатлар сони бўйича рекорд ўрнатилган эди – 9 та.

#АҚШ #электромобил #Lucid Air