Линда Яккарино Х ижтимоий тармоғи бош директорлигидан кетди

Х ижтимоий тармоғи бош директори Линда Яккарино компаниядан кетишини эълон қилди.

«Ажойиб ўтган икки йилдан кейин мен Х бош директорлиги лавозимидан кетишга қарор қилдим. Илон Маск билан унинг Х борасидаги қарашларини илк бор муҳокама қилганимизда, бу компаниянинг улкан миссиясини амалга ошириш учун ноёб имконият эканини англаган эдим. У менга сўз эркинлигини ҳимоя қилиш, компанияни тубдан ўзгартириш ва Хъни ҳамма нарса учун мўлжалланган иловага айлантириш борасида ишонч билдиргани учун чексиз миннатдорман», — деб ёзади Яккарино Х’даги постида.

Яккарино ўз истеъфоси сабабини очиқламаган.

Илон Маск унга жавобан Хъдаги фаолияти учун Яккаринога қисқа миннатдорчилик билдирди.

Линда Яккарино 2023 йил июнда ижтимоий тармоққа эгалик қилувчи Илон Маскнинг таклифига кўра, Х бош директорлигига тайинланган эди. Бунга қадар у NBCUniversal медиакорпорациясининг реклама савдоси бўлимини бошқарган. Маск Х директорлар кенгаши раиси ҳисобланади ва компанияда деярли барча қарорларни ўзи қабул қилади. Илон Маск Twitterʼни сотиб олганидан кейин ребрендинг ўтказди ва қатор янгиликлар киритди. Яккарино охиригача Маскни реклама берувчилар ва фойдаланувчилардан ҳимоя қилиб келди.