АҚШ Давлат департаменти 1,3 мингдан ортиқ ходимини ишдан бўшатишга қарор қилди — AP

АҚШ Давлат депаратменти 1,3 мингдан ортиқ ходимини ишдан бўшатмоқда. Бу ҳақда идоранинг юқори мартабали ходимига таяниб Associated Press хабар берди.

Унинг сўзларига кўра, Давлат департаменти 1107 нафар ишчи ва АҚШ ҳудудида фаолият юритадиган дипломатик хизматларнинг 246 нафар ходимини ишдан бўшатилиши ҳақида хабардор қилган.

Агентлик ўрганган Давлат департаментининг ички ҳужжатига кўра, дипломатик хизматлар ходимлари ишдан бўшатилишлари ҳақидаги тегишли хабарномани олгач, дарҳол 120 кунга маъмурий таътилга йўл олади, шундан кейин расман ишидан айрилади. Давлат хизматчиларининг аксарияти учун эса ишдан бўшаш жараёни 60 кунга чўзилади.

Таъкидланишича, Давлат департаменти «дипломатик устувор йўналишларга эътибор қаратиш мақсадида ички фаолиятни оптималлаштирмоқда», қисқартириш эса «эҳтиёткорлик билан режалаштирилган» бўлиб, «асосий бўлмаган функциялар, такрорланувчи ёки ортиқча бўлимлар» ҳамда ходимларнинг вазифа ва мажбуриятларини бирлаштириш мумкин бўлган бўлимларга тааллуқли.

Маълумотларга кўра, Давлат департаментидаги қисқартиришларни АҚШ президенти Доналд Трамп, давлат котиби Марко Рубио ва унинг республикачи иттифоқчилари маъқуллаган. Шу билан бирга, амалдаги ва собиқ дипломатлар ушбу қарорни сир тутиб келган, чунки бу «АҚШ таъсирини ҳамда унинг хориждаги мавжуд ва пайдо бўлаётган таҳдидларга қарши туриш қобилиятини заифлаштиради».

Доналд Трамп иккинчи президентлик муддати бошланганидан бери давлат хизматчиларини қисқартириш ишларини фаол амалга оширмоқда. Шу билан бирга, The Washington Post газетасининг ёзишича, июн ойида ишдан бўшатилган ходимларнинг бир қисми яна ишга тиклана бошлаган.