Россияга қарши санкцияларнинг 18-пакети Словакияга боғлиқ бўлиб қолмоқда

Европа Иттифоқи Россиянинг Украина шаҳарларига ҳужумларини кучайтираётгани фонида имкон қадар тезроқ қабул қилмоқчи бўлган Россияга қарши янги, 18-санкция пакети Словакия томонидан блокланишда давом этмоқда. Бу ҳақда 11 июл, жума куни кечқурун иттифоққа аъзо давлатлар элчиларининг учрашувидан сўнг Европа Иттифоқи бир қанча дипломатлари маълум қилишди. Уларнинг сўзларига кўра, Братислава билан маслаҳатлашувлар давом этади — эҳтимол, яқин икки кун ичида.

Маълумки, Словакия Европа Комиссияси томонидан таклиф қилинган Россияга қарши 18-санкция пакетига вето қўйган, чунки у пакетнинг ўзидан эмас, балки Европа Комиссиясининг RePowerEU - 2027 йилгача Россия энергетикасидан бутунлай воз кечиш режасидан қониқмаган. Айни пайтда, санкцияларни қўллаш учун Европа Иттифоқи барча аъзо давлатлар томонидан бир овоздан қарор қабул қилиши керак, Словакия раҳбарияти пакетни тасдиқлашни RePowerEU бўйича муросага боғлаш орқали фойдаланган.

Дипломатлар ва Европа Иттифоқи расмийларига кўра, Братислава билан ҳам Еврокомиссия ва ЕИ Кенгаши даражасида, ҳам Европа Иттифоқининг бошқа давлатлари билан икки томонлама интенсив музокаралар олиб борилмоқда, бироқ Словакия ветосини бекор қилмаяпти.

«Европа комиссияси катта иш қилди, у (Словакияга) жуда оқилона кафолатлар берди», — деди дипломатлардан бири. «Мен билишимча, Еврокомиссия таклиф қилган нарса Словакия учун ташвишланишни тўхтатиш учун етарли. Бироқ, номаълум сабабларга кўра, бу Братислава учун ҳали ҳам камлик қиляпти».