Лондонда Palestine Action ташкилоти тарафдорлари қўлга олинди

Буюк Британия ҳукумати фуқаролик итоатсизлиги усулларидан фойдаланадиган Фаластин тарафдори бўлган ташкилотни террорчи деб билади. Уни қўллаб-қувватлаш 14 йилгача қамоқ жазосига олиб келиши мумкин.

Фото: AP /Frank Augstein

Лондонда мамлакатда тақиқланган Фаластин тарафдори бўлган Palestine Action ташкилотини қўллаб-қувватлаган намойишнинг 41 иштирокчиси полиция томонидан қўлга олинди. Яна бир киши полициячига ҳужум қилганликда гумонланиб ҳибсга олинган.

Британия парламенти биноси ёнидаги Нелсон Мандела ҳайкали ёнида 50 га яқин намойишчи тўпланган. Улар «Мен геноцидга қаршиман. Мен Palestine Action'ни қўллаб-қувватлайман» деган шиорларни кўтариб олган. Манчестер, Уэлс ва Шимолий Ирландияда Palestine Action билан бирдамлик акциялари бўлиб ўтди. Манчестер ва Уэлсда полиция намойишчиларни қўлга олди. Ўтган ҳафтада Лондонда ўтказилган худди шундай акцияда 29 киши ҳибсга олинган эди.

5 июл куни Буюк Британия ҳукумати Palestine Action'ни террорчилик ташкилотлари рўйхатига киритди. Унга аъзо бўлиш, унинг йиғилишларида қатнашиш ва унинг фаолиятини ҳар қандай шаклда қўллаб-қувватлаш «Терроризмга қарши кураш» қонунига биноан жиноий ҳуқуқбузарлик бўлиб, энг юқори жазо 14 йилга озодликдан маҳрум қилиш билан белгиланади.

Palestine Action террор ташкилоти деб тан олиниши учун 20 июн куни Англия жанубидаги Оксфордшир графлигидаги Брайз-Нортон авиабазасига фаолларнинг кириб келиши ва иккита ёнилғи қуювчи самолётга зарар етказилиши асос бўлди. Ташкилот ўз ҳаракатларини Лондон Исроилни қўллаб-қувватлаши орқали «Ғазодаги геноцид ва Яқин Шарқдаги уруш жиноятларининг иштирокчиси» эканлиги билан изоҳлади.

#Буюк Британия #Фаластин #Palestine Action