Трамп Зеленский Москвага ҳужум қилмаслиги кераклигини айтди

Financial Times Доналд Трамп Зеленский билан мулоқотда Украинани Москва ва Петербургга зарбалар беришга чақиргани ҳақида ёзди. АҚШ президенти эса журналистларнинг бу борадаги саволига жавоб қайтарди.

Фото: Reuters

АҚШ президенти Доналд Трамп Украина президенти Володимир Зеленский Москвага ҳужум қилмаслиги кераклигини айтди, деб хабар беради Reuters.

«Йўқ, у [Зеленский] Москвага ҳужум қилмаслиги керак», — деди Трамп журналистларнинг Украина Москвага зарбалар йўллаши керакми деган саволларига жавобан.

АҚШ президенти бундай баёнотни Financial Times газетаси ўз манбаларига таяниб, Трамп июл бошларида Зеленский билан суҳбатда Украинани Москва ва Петербургга ҳужум қилишга чақиргани ҳақида ёзганидан кейин билдириб ўтди.

Ушбу мақоладан кейин Оқ уй матбуот котиби Кэролайн Левитт «Financial Times ўлиб бораётгани сабаб, эътибор тортиш мақсадида контекстдан сўзларни юлиб олиши билан танилганини» маълум қилди.

Трамп ва Зеленский 4 июлда бўлиб ўтган суҳбатда Украина Қуролли кучларининг Москвага зарбаларини муҳокама қилгани тўғрисида The Washington Post газетаси ҳам ёзган эди.

#Доналд Трамп #Володимир Зеленский