Украина ташқи ишлар вазири ўринбосари: Истанбул формати «ўз маъносини йўқотди»

Истанбулдаги музокаралар формати ўз маъносини йўқотди, деди Украина ташқи ишлар вазирининг биринчи ўринбосари Сергей Кислица The Kyiv Independent нашрига берган интервюсида. Унинг фикрича, музокараларни давом эттириш учун Россия делегацияси Россия президенти Владимир Путиндан «янги мандат олиши» керак, чунки у ҳозир фақат Киев капитуляциясини хоҳламоқда.

«Уларнинг (Россия музокарачилари)нинг мантиғи бизникига тескари. Биз: келинг, етакчилар учрашуви учун тўғри шарт-шароит яратишга, келишувларга эришиш учун конструктив муҳит яратишга ҳисса сифатида ўт очишни тўхтатиш режимини яратайлик, деяпмиз. Улар очиқ айтди: »Йўқ, биринчи навбатда сиз бизнинг талабларимизни қабул қиласиз — таслим бўлинг — ва шундан кейингина биз раҳбарлар учрашувини ташкил қиламиз. Шундан кейин эса бу талабларни бажаришга ҳаракат қиласиз», — деди Кислица Украинадаги урушни тугатиш учун Москва ва Киев ўртасида музокараларнинг янги босқичи тайёрланяптими, деган саволга жавоб бериб.

Украина ташқи ишлар вазири ўринбосари, шунингдек, 2025 йилда Истанбулда бўлиб ўтган биринчи учрашувда россиялик музокарачилардан бири унга: «Мен қуруқ қўл билан кета олмайман, ҳеч бўлмаганда асирларни алмашиш бўйича келишиб олишимиз керак», деб айтганини даъво қилмоқда.

Сергей Кислицанинг сўзларига кўра, Киев Россия ва Украина президентлари ўртасида учрашув ўтказилишини талаб қилмоқда, чунки музокаралар олиб бораётган делегациялар «Европадаги энг йирик урушнинг мураккаблиги, чуқурлиги ва унинг барча оқибатлари, Россиядаги диктатура билан қўшилиб, ҳамма нарса бир кишининг иродасига боғлиқлиги туфайли» мустақил равишда муваффақиятга эриша олмайди.

Дипломат фикрича, Владимир Путин экспертлар даражасида музокаралар олиб борилаётганига ишора қилиб, «жараённи бюрократлаштиради».