Трамп Coca-Cola рецептини ўзгартиришни талаб қилди, компания бунга рози

Маълум бўлишича, компания ичимликни ишлаб чиқариш жараёнида маккажўхори сиропини қамиш шакарига алмаштиришга рози бўлган.

Coca-Cola компанияси Америка бозори учун ишлаб чиқариладиган ичимликларда юқори фруктозали маккажўхори сиропини табиий шакарқамишга алмаштиришга рози бўлди. Бу ҳақда АҚШ президенти Доналд Трамп Truth Social ижтимоий тармоғида маълум қилди.

Трамп корпорация топ-менежерлари билан шахсан музокаралар олиб борганини айтиб, қабул қилинган қарор учун уларга миннатдорлик билдирди.

"Мен Coca-Cola билан Америка Қўшма Штатларидаги ичимлик таркибида РEАЛ шакарқамишдан фойдаланиш ҳақида гаплашдим ва улар бунга рози бўлишди. Мен Coca-Colaʼдаги барча ваколатлиларга раҳмат айтмоқчиман", деб ёзган Трамп.

Ушбу ташаббус Трамп маъмуриятининг соғлиқни сақлаш вазири Роберт Френцис Кеннеди томонидан қўллаб-қувватланадиган “Американи яна соғлом қиламиз” (МАҲА) дастури билан боғлиқ.

Лойиҳа маҳсулотлар таркибидаги зарарли ингредиентлар улушини камайтириш ва табиий компонентлардан фойдаланишни рағбатлантиришга қаратилган.

Кеннеди, шунингдек, Америка рационида истеъмол қилинадиган шакар миқдорини ҳам танқид қилган.

Reuters'га кўра, Coca-Cola аллақачон бир қатор мамлакатлардаги маҳсулотларучун шакарқамиш сиропидан фойдаланади. 

АҚШнинг ўрта ғарбий қисмида жойлашган маккажўхори ишлаб чиқарувчилари узоқ вақтдан бери Вашингтондаги қонунчиларга катта таъсир ўтказиб келади. Президентнинг ватани Флорида штати эса мамлакатнинг энг йирик шакарқамиш ишлаб чиқарувчиси ҳисобланади. 

"Юқори фруктоза маккажўхори сиропини қамиш шакарига алмаштириш мантиққа тўғри келмайди", деган Маккажўхори қайта ишловчилар уюшмаси президенти ва бош директори Жон Боде.

“Бундан ташқари, юқори фруктозали маккажўхори сиропини қамиш шакарига алмаштириш Американинг озиқ-овқат ишлаб чиқаришидаги минглаб иш жойларига қимматга тушади, фермер хўжаликлари даромадини камайтиради ва хорижий шакар импортини оширади, буларнинг барчаси озуқавий фойда келтирмайди" – деган Жон Боде, Маккажўхори қайта ишловчилар уюшмаси президенти

АҚШ президенти кола ичишни яхши кўришини яширмайди. Март ойида у журналистларга Овал кабинетидаги иш столида ичимликка буюртма бериш учун махсус тугма ўрнатилганини айтганди.

Унинг сўзларига кўра, Оқ уйнинг баъзи меҳмонлари бу тугма ядро қуролини ишга тушириш учун мўлжалланган деб нотўғри ўйламоқда.