Москва суди журналист Юрий Дудни сиртдан ҳибсга олди

Басманний суди Юрий Дудни ҳибсга олинган ёки Россия Федерациясига экстрадиция қилинган пайтдан бошлаб икки ой муддатга ҳибсда сақлаш ҳақида қарор чиқарди. Журналист «чет эл агенти» вазифасини бажаришдан бўйин товлаганликда айбланмоқда.

Юрий Дуд Фото: Арсений Несходимов / РБК

Москванинг Басманний туман суди ҳозирда Россия Федерациясидан ташқарида истиқомат қилаётган журналист Юрий Дудни Россия қонунчилигида «чет эл агентлари» бўйича назарда тутилган мажбуриятларни бажаришдан бўйин товлаганлик иши бўйича икки ой муддатга ҳибсда сақлаш тўғрисида қарор чиқарди. Бу ҳақда 22 июл, сешанба куни кечқурун Москва судлари матбуот хизмати Telegram-каналида хабар берди.

Суд томонидан танланган эҳтиёт чораси Дуд Россия ҳудудига экстрадиция қилинган пайтдан ёки мамлакатда ҳибсга олинган пайтдан эътиборан амалга оширилиши кераклиги кўрсатилган. Айни пайтда ТАСС агентлиги ҳуқуқ-тартибот идораларидаги манбаларига таяниб, журналист халқаро қидирувга берилгани ҳақида хабар қилди.

Россия Федерацияси Тергов қўмитаси июл ойи бошида Юрий Дудга нисбатан «чет эл агенти» вазифасини бажармаганлиги учун жиноий иш қўзғатилганини маълум қилди. Унга қўйилган модданинг энг юқори жазоси беш йилгача озодликдан маҳрум қилишни назарда тутади.

2022 йил апрел ойида Россия расмийлари Дудга «чет эл агенти»-ОАВ мақомини берди. «Коммерсант» газетасининг эслатишича, 2024 йил октябр ойида Россия Федерацияси Олий суди унинг «чет эл агентлари» реестрига киритилганлиги тўғрисида журналистга хабар берилмагани сабабли Адлия вазирлигига нисбатан фуқаролик даъвосини кўриб чиқишдан бош тортган.

#Россия #чет эл агенти #Юрий Дуд