Сон Ҳёнг Мин 10 йиллик фаолиятидан кейин «Тоттенҳэм» билан хайрлашди

«Тоттенҳэм» ҳужумчиси ва сардори Сон Ҳёнг Мин кўпчилик учун кутилмаганда клубни тарк этди. Жанубий кореялик 33 ёшли футболчи бу ҳақда Сеулда «Нюкасл»га қарши ўртоқлик ўйинидан олдин ўтказилган матбуот анжуманида эълон қилди.

Футболчи бу ҳақда гапираркан, кўз ёшларини тия олмади.

Энди у катта эҳтимол билан фаолиятини АҚШда давом эттиради.

Кетиши сабаби

Сон кетишини эълон қиларкан, фаолиятида ўзгаришлар қилиш даври келганини айтиб ўтди. «Тоттенҳэм»даги 10 йилда у Англия премер-лигасининг ҳақиқий юлдузларидан бири ҳамда Лондон клуби афсонасига айланди.

«Мен Шимолий Лондонга ёш болалигимда келганман, 23 ёшда эдим - жуда ёш эдим. Энди бу клубдан катта ёшли, мағрур эркак сифатида кетяпман», – дея Соннинг сўзларини келтиради клуб расмий сайти.

«Тоттенҳэм» бош мураббийи Томас Франк футболчи клубни энг тўғри паллада, юқори нотада тарк этаётганини таъкидлаган.

«Агар бу Соннининг жамоамиздаги сўнгги ўйини бўлса, у ҳолда фаолиятининг бу босқичини ўз ватанида якунлаш қандай гўзал бўлади! Бу ажойиб якун бўлиши мумкин», – дея таъкидлади Франк.

У 3 август куни «Нюкасл»га қарши ўйинни илк дақиқалардан бошлади ва иккинчи бўлимда икки жамоа футболчилари томонидан кузатиб қўйилди.

Футболчи захира ўриндиғида ўтирганида ҳам йиғлаб олди.

Ютуқлари

Кореялик футболчининг кетиши – клуб учун катта йўқотиш. Сон «шпорлар» сафида 10 йил давомида 454 та ўйинда майдонга тушиб, 173 та гол урган. У АПЛда клубнинг энг яхши тўпурарлари рўйхатида Ҳарри Кейндан (213 гол) кейинги иккинчи ўринни эгаллаб турибди ва клуб тарихдаги энг яхши 5 тўпурар қаторига киради.

Унинг фаолиятидаги энг муҳим лаҳза – 2024/2025 йиллар мавсумида Европа Лигасида ғолиб бўлгани. Шунингдек, у 2021/2022 йилги мавсумда «Ливерпул» ҳужумчиси Муҳаммад Салоҳ билан бир хилда натижа кўрсатиб, турнирнинг энг яхши тўпурари бўлган.

Шунингдек, Сон Ҳёнг Мин Корея миллий жамоасида ҳам етакчи футболчи – у асосий жамоа сафида 134 та ўйинда майдонга тушиб, 51 та гол урган. Халқаро миқёсдаги энг муҳим ютуқ – 2018 йилги Осиё ўйинларининг олтин медали. Сон миллий жамоадаги фаолиятини якунлагани ҳақида ҳали эълон қилмаган.

У муқаддам Германиянинг «Ҳамбург» ва «Байер» клубларида ҳам тўп сурган.

Янги чақириқлар ва мақсадлар

Шанба куни нуфузли инсайдер Фабрицио Романо Сон «Лос-Анжелес» сафига йўл олиши мумкинлигини хабар қилди. Бундан ташқари, унинг хизматларига Саудя Арабистони клубларидан ҳам қизиқиш бор.

Transfermarkt бўйича Сон Ҳёнг Миннинг трансфер нархи 20 миллион еврони ташкил этади. Унинг «Тоттенҳэм» билан шартномаси муддати бир йилдан кейин тугарди.