Трамп Intel раҳбарини Хитой билан яқинлашиб кетганликда айблаб, истеъфо беришга чақирди

Жаноб Тан март ойида рақобатчилардан ортда қолган АҚШ чиплари саноатини яна ривожлантириб, гигантга айлантириш учун тайинланган эди. Бу мақсадда бюджетдан миллиардлаб доллар олинган. 7 август кунги баёнотда Intel компанияси Трампнинг «АҚШ биринчи ўринда» сиёсати ортидан катта сармоя олганини тасдиқлади. Баёнотда компания Трамп администрацияси билан доим ҳамкорликка тайёрлигини ҳам қўшимча қилган.

Малайзияда туғилган, Сингапурда ўсган АҚШ фуқароси Тан чип ишлаб чиқариш саноатида машҳур мутахассислардан. У раҳбарликка келаркан, Intel бу йил минглаб иш ўринларини қисқартирди.

Аввалроқ компанияни танқид қилган ва чип саноати учун тарифларни оширишга тайёрланаётган Трампнинг танқидларидан кейин Intel акциялари дарров 3 фоиздан кўпроққа тушиб кетди.

«Intel бош директори жуда зиддиятли ва дарҳол истеъфога чиқиши керак. Бу муаммонинг бошқа ечими йўқ», деб ёзди Трамп ўз саҳифаларида.

Америкаликларнинг Хитой фирмаларига сармоя киритиши аслида ноқонуний эмас. Аммо Вашингтон Трампнинг биринчи муддатидан бери чекловларни кучайтирган, чунки у илғор технологиялар ҳақида гап кетганда АҚШ ва Хитой ўртасидаги бизнес алоқаларини чеклашга интилмоқда, чунки демократлар ҳам, республикачилар ҳам миллий хавфсизликни таъминлаш ортидан шу йўлдан юришга мажбур.

Шу ҳафта бошида берган баёнотида Intel ўзининг ҳали янги бош директорини ҳимоя қилишга уринди. Жаноб Тан ва компания «АҚШ миллий хавфсизлиги ва мудофаа экотизимидаги сиёсатига чуқур содиқ эканини» айтди.

Саноат олами таҳлилчиларига кўра, Трамп жаноб Таннинг Хитой билан алоқаларидан хавотирда ва Intel’га бошқа масалалар юзасидан босим ўтказилади деб ўйлаяпти.

Президент бу билан Intel’нинг АҚШдаги сармоялари бўйича юзага келиши мумкин бўлган келишмовчиликларга ва Оқ уй томонидан қўллаб-қувватланган Тайваннинг TCMC фирмаси билан ҳамкорлик ҳақидаги ҳисоботларга ишора қилди.

Эслатиб ўтамиз, АҚШнинг бирор президенти Трампчалик бизнес раҳбарларини нишонга олмаган.

АҚШ инвестиция фирмалари ва Хитой бизнеслари ўртасидаги алоқаларни ўрганувчи 2024 йилги Конгресс ҳисоботидан жаноб Таннинг Пекин билан алоқалари ҳам эътиборга олинган эди.