Tramp Turkiya va kurdlarni IShID jangarilarining qochishiga yo‘l qo‘ymaslikka chaqirdi

Foto: AP Photo/Andrew Harnik

AQSh prezidenti Donald Tramp Turkiya va kurdlarni IShIDning panjara ortida ushlab turilgan jangarilarining qochishiga yo‘l qo‘ymaslikka chaqirdi.

“AQSh IShIDning eng ashaddiy jangarilarini ushlab turibdi. Turkiya va kurdlar ularning qochishiga yo‘l qo‘ymasligi lozim. Yevropa ularni qaytarib olishi kerak edi. Ular buni hozir qilishlari lozim. Ular hech qachon AQShga kelolmaydi, ularni bu yerga qo‘yishmaydi”, deb yozgan Tramp tvitterda.

Avvalroq yuzlab mahbus jangarilar Anqaraning harbiy amaliyoti ortidagi sarosimadan foydalanib kurdlar nazoratidagi turmalardan qochgani haqidagi xabarlar paydo bo‘ldi.

Shuningdek, jangarilar oilalarining 700 ga yaqin a'zosi vaqtinchalik lagerlardan qochgan. Gap Ayn-Iso, Kobani, Hasaka va Qamishli shaharlaridagi turmalar va vaqtinchalik saqlash markazlari haqida bormoqda.

Ta'kidlanishicha, bu joylarda 11 mingga yaqin kishi, jumladan 9 ming suriyalik va iroqlik hamda 50 ta davlatdan 2 mingga yaqin jangari ushlab turilgan.

#AQSh #Turkiya #IShID

Turkiya 9 oktabr kuni Suriya shimolidagi kurdlarga qarshi quruqlikdagi harbiy kampaniya boshladi. «Tinchlik bulog‘i» nomli amaliyotdan maqsad - Turkiya chegaralari yaqinida terrorchilar uchun yo‘lak qoldirmaslik hisoblanadi