Turkiya S-400 tizimidan qanday hollarda foydalanishini ma'lum qildi

Mudofaa vaziri Xulusi Akarning so‘zlariga ko‘ra, Turkiyadagi S-400 unga hujum qilmaydiganlarga tahdid solmaydi.

Foto: RIA Novosti

Turkiya Rossiyadan sotib olingan S-400 zenit-raketa tizimlaridan faqat xavf paydo bo‘lgandagina foydalanadi. Bu haqda mamlakat milliy mudofaa vaziri Xulusi Akar ma'lum qildi.

"Turkiya S-400ni faqat tahdid va xavf paydo bo‘lganida ishga tushiradi. Turkiyadagi S-400 unga hujum qilmaydiganlarga tahdid solmaydi", - dedi u.

Bundan tashqari, Akar AQShning S-400 sababli Turkiyaga nisbatan qator cheklovlar kiritishi "alyans ruhi"ga mos kelmasligini aytdi.

Xulusi Akar, shuningdek, Turkiya S-400 tizimlaridan NATO tizimidan mustaqil ravishda foydalanishini bildirdi.

Rossiya va Turkiya 2017 yilda Anqaraga S-400 tizimlarini yetkazib berish bo‘yicha shartnoma tuzgandi. Turkiyaning Rossiya zenit-raketa tizimlarini sotib olishi AQSh va alyansning keskin noroziliklariga sabab bo‘ldi. Vashington Anqarani beshinchi avlod F-35 qiruvchi samolyotlarini ishlab chiqarish dasturidan chiqarib tashladi.

#Turkiya #S-400