O‘zbekiston va Islom taraqqiyot banki hamkorligida 100 mln dollarlik jamg‘arma tashkil etilishi kutilmoqda

Vazirlik xabariga ko‘ra, joriy yilda O‘zbekiston hukumati va Islom taraqqiyot banki hamkorligida boshlang‘ich kapitali 100 mln AQSh dollari bo‘lgan "Iqtisodiy imkoniyatlarni kengaytirish jamg‘armasi" (Economic Yemrowermept Fund) tashkil qilinishi kutilmoqda.

Tadbir davomida O‘zbekistonda kambag‘allikni qisqartirish, tadbirkorlikni qo‘llab-quvvatlash borasida amalga oshirilayotgan islohotlar, “Ayollar daftari” asosida xotin-qizlar muammolari bilan ishlashda banklar tomonidan taqdim etilayotgan loyihalar xususida so‘z yuritildi. 

Ta'kidlanganidek, tashkil etilishi kutilayotgan jamg‘arma tomonidan kichik va o‘rta biznesni rivojlantirishni qo‘llab-quvvatlash uchun platforma yaratish, daromad manbalarini ta'minlashga qaratilgan loyihalarni amalga oshirish hamda bu jarayonlarda mahallalar bilan yaqindan hamkorlik qilish ko‘zda tutilmoqda. 

Tadbir so‘ngida kutilayotgan ikki taraflama muzokaralarni 2021 yilning iyun oyida Toshkent shahrida bo‘lib o‘tadigan hukumatlararo uchrashuvda davom ettirishga o‘zaro kelishib olindi.

Avvalroq, Islom taraqqiyot banki prezidenti may oyida O‘zbekistonga tashrif buyurishi kutilayotgani xabar qilingandi.