O‘zbekistonda mobil raqam qariyb 1,1 mlrd so‘mga sotildi

Onlayn auksionda +998200000000 mobil raqami 1 mlrd 70 mln so‘mga sotildi. Shuningdek, xaridor 32,4 mln so‘m komissiya yig‘imini ham to‘lashi kerak bo‘ladi.

Tovar-xomashyo birjasida o‘tkazilgan onlayn auksionda +998200000000 mobil raqami 1 mlrd 70 mln so‘mga sotilgan. Auksion qoidalariga ko‘ra, xaridordan komissiya yig‘imi (bu yerda 32,4 mln so‘m) ham undirilishi ko‘zda tutilgan. Mijoz jismoniy shaxs ekani ko‘rsatilgan.

Tovar-xomashyo birjasi axborot xizmatining ma’lum qilishicha, auksion g‘olibi tomonidan to‘lov amalga oshirilsa, bu birja rasmiy sahifalarida e’lon qilinadi. Mijoz belgilangan miqdordagi to‘lovni 5 ish kuni ichida qilishi kerak.

Ma’lumot uchun, O‘zbekistonda mobil raqamlarni auksion orqali sotish jarayoni 2019 yilning 4 iyunidan boshlab yo‘lga qo‘yilgan. Auksion onlayn shaklda mobilraqam.uzex.uz veb-sayti orqali o‘tkaziladi.

#auksion #mobil raqam